റയലിനെതിരെയുള്ള മത്സരത്തിൽ മറ്റൊരു താരത്തെ കൂടി പിഎസ്ജിക്ക് നഷ്ടമായേക്കും!

യുവേഫ ചാമ്പ്യൻസ് ലീഗിന്റെ പ്രീ ക്വാർട്ടറിൽ പിഎസ്ജിയുടെ എതിരാളികൾ റയൽ മാഡ്രിഡാണ്.വരുന്ന 15-ആം തീയതി രാത്രി ഇന്ത്യൻ സമയം 1:30-നാണ് ആദ്യപാദ മത്സരം അരങ്ങേറുക.പിഎസ്ജിയുടെ മൈതാനമായ പാർക്ക് ഡെസ് പ്രിൻസസിൽ വെച്ചാണ് ഈ മത്സരം നടക്കുക.

എന്നാൽ പിഎസ്ജിക്ക് തിരിച്ചടിയേൽപ്പിക്കുന്ന ഒരു വാർത്തയാണ് ഇപ്പോൾ പുറത്തേക്ക് വരുന്നത്.അതായത് പിഎസ്ജിയുടെ അർജന്റൈൻ സൂപ്പർ താരമായ ലിയാൻഡ്രോ പരേഡസിനെ ഈ മത്സരത്തിൽ ലഭ്യമായേക്കില്ല. പ്രമുഖ ഫ്രഞ്ച് മാധ്യമമായ ലെ എക്യുപെയാണ് ഇക്കാര്യം റിപ്പോർട്ട് ചെയ്തിരിക്കുന്നത്.അഡക്റ്റർ ഇഞ്ചുറിയാണ് താരത്തിന് പിടി പെട്ടിരിക്കുന്നത്.

കഴിഞ്ഞ ലില്ലിക്കെതിരെയുള്ള മത്സരത്തിൽ പരേഡസ് 85 മിനുട്ട് കളിച്ചിരുന്നു.ഒരു അസിസ്റ്റ് സ്വന്തമാക്കുകയും ചെയ്തിരുന്നു. പിന്നീടാണ് പരിക്ക് വിനയായത്.വരുന്ന റെന്നസിനെതിരെയുള്ള മത്സരവും താരത്തിന് നഷ്ടമായേക്കും.

ഈ സീസണിൽ പലപ്പോഴും പരിക്കുകൾ പരേഡസിനു തലവേദനകൾ സൃഷ്ടിച്ചിട്ടുണ്ട്.കാൽതുടയിലേറ്റ പരിക്ക് മൂലം സീസണിലെ തുടക്കത്തിൽ ഒരുപിടി മത്സരങ്ങൾ പരേഡസിന് നഷ്ടമായിരുന്നു.റയലിനെതിരെയുള്ള മത്സരത്തിൽ പരേഡസ് ഇല്ലെങ്കിൽ അത്‌ പിഎസ്ജിക്ക് തിരിച്ചടിയാവും.പരിക്ക് അലട്ടുന്ന സൂപ്പർതാരങ്ങളായ നെയ്മറും റാമോസും ഈ മത്സരം കളിക്കുമോ എന്നുള്ള കാര്യത്തിൽ വ്യക്തത കൈവന്നിട്ടില്ല.