മുമ്പ് ഞങ്ങൾ അദ്ദേഹത്തിനെതിരെ നന്നായി ബുദ്ധിമുട്ടി, ഇപ്പോൾ ഒപ്പമുള്ളതിൽ വളരെ സന്തോഷം : ലെവയെ കുറിച്ച് ബാഴ്സ ഡിഫന്റർ!

യുവേഫ ചാമ്പ്യൻസ് ലീഗിൽ ഇന്ന് നടക്കുന്ന മത്സരത്തിൽ കരുത്തർ തമ്മിലാണ് ഏറ്റുമുട്ടുന്നത്. സ്പാനിഷ് വമ്പൻമാരായ ബാഴ്സയുടെ എതിരാളികൾ ജർമൻ ശക്തികളായ ബയേൺ മ്യൂണിക്കാണ്. ഇന്ന് രാത്രി ഇന്ത്യൻ സമയം 12:30ന് അലിയൻസ് അരീനയിൽ വെച്ചാണ് ഈയൊരു മത്സരം നടക്കുക.

ഈ മത്സരത്തിലെ പ്രധാന ആകർഷണ കേന്ദ്രം സൂപ്പർ താരം റോബർട്ട് ലെവന്റോസ്ക്കി തന്നെയാണ്. കഴിഞ്ഞ 8 വർഷക്കാലം ബയേണിന് വേണ്ടി ഗോൾമഴ പെയ്യിച്ച ലെവന്റോസ്ക്കി ഇപ്പോൾ ബാഴ്സ ജേഴ്‌സിയിലാണ് അലിയൻസ് അരീനയിൽ ഇറങ്ങുന്നത്.ബയേണിനെതിരെ ഗോളുകൾ നേടാൻ ലെവക്ക് സാധിക്കുമോ,അതല്ല ഇനി ലെവയെ പൂട്ടാൻ ബയേണിന് സാധിക്കുമോ എന്നുള്ളതാണ് ആരാധകർ ഉറ്റുനോക്കുന്നത്.

ഏതായാലും ഈ മത്സരത്തിന് മുന്നോടിയായുള്ള പത്രസമ്മേളനത്തിൽ ബാഴ്സയുടെ പ്രതിരോധനിര താരമായ റൊണാൾഡ് അരൗഹോ നിരവധി കാര്യങ്ങളെക്കുറിച്ച് സംസാരിച്ചിട്ടുണ്ട്. സൂപ്പർ താരം റോബർട്ട് ലെവന്റോസ്ക്കിയെ കുറിച്ചും ഇദ്ദേഹം മനസ്സ് തുറന്നിട്ടുണ്ട്.ലെവന്റോസ്ക്കി മുമ്പ് തങ്ങളെ ഒരുപാട് ബുദ്ധിമുട്ടിച്ച താരമാണെന്നും ഇപ്പോൾ ഞങ്ങളോടൊപ്പമുള്ളതിൽ ഒരുപാട് സന്തോഷമുണ്ട് എന്നുമാണ് അരൗഹോ പറഞ്ഞിട്ടുള്ളത്. അദ്ദേഹത്തിന്റെ വാക്കുകൾ ഇങ്ങനെയാണ്.

” റോബർട്ട് ലെവന്റോസ്ക്കിയുടെ ക്വാളിറ്റി എന്താണ് എന്നുള്ളത് നമുക്കെല്ലാവർക്കും അറിയാം.മുമ്പ് അദ്ദേഹത്തിനെതിരെ ഞങ്ങൾ നന്നായി ബുദ്ധിമുട്ടിയിട്ടുണ്ട്. പക്ഷേ ഇപ്പോൾ അദ്ദേഹം ഞങ്ങളോടൊപ്പം ഉള്ളതിൽ അതിയായ സന്തോഷമുണ്ട്. വളരെയധികം അതിശയപ്പെടുത്തുന്ന ഒരു താരമാണ് അദ്ദേഹം ” ഇതാണ് ലെവയെ കുറിച്ച് സഹതാരമായ അരൗഹോ പറഞ്ഞിട്ടുള്ളത്.

ബാഴ്സയിൽ എത്തിയിട്ടും ലെവന്റോസ്കിയുടെ ഗോളടി മികവിന് മാറ്റങ്ങളൊന്നും സംഭവിച്ചിട്ടില്ല. ലാലിഗയിൽ ആറു ഗോളുകൾ നേടിയ ലെവന്റോസ്ക്കി തന്നെയാണ് ഒന്നാം സ്ഥാനത്തുള്ളത്. കഴിഞ്ഞ ചാമ്പ്യൻസ് ലീഗ് മത്സരത്തിൽ വിക്ടോറിയക്കെതിരെ ഹാട്രിക് നേട്ടമാണ് താരം കരസ്ഥമാക്കിയിരുന്നത്.