മികച്ച താരത്തെ കൊണ്ട് വന്ന് മോശം ടീമായി മാറി, വിശ്വസിക്കാൻ പോലും സാധിക്കുന്നില്ല:റയലിനെതിരെ ആരാധകർ!
ഇന്നലെ ചാമ്പ്യൻസ് ലീഗിൽ നടന്ന മത്സരത്തിൽ നിലവിലെ ജേതാക്കളായ റയൽ മാഡ്രിഡിന് ഞെട്ടിക്കുന്ന ഒരു തോൽവി ഏറ്റുവാങ്ങേണ്ടി വന്നിരുന്നു. ഒന്നിനെതിരെ 3 ഗോളുകൾക്കാണ് Ac അവരെ പരാജയപ്പെടുത്തിയിട്ടുള്ളത്.സാന്റിയാഗോ ബെർണാബുവിൽ വെച്ചു കൊണ്ടാണ് റയൽ മാഡ്രിഡ് ഈ തോൽവി ഏറ്റുവാങ്ങിയിട്ടുള്ളത്. നേരത്തെ ബാഴ്സലോണയോട് എതിരില്ലാത്ത നാല് ഗോളുകൾക്ക് റയൽ നാണംകെട്ടതും സാന്റിയാഗോ ബെർണാബുവിൽ വെച്ച് കൊണ്ട് തന്നെയായിരുന്നു.
റയലിന്റെ ഈ മോശം പ്രകടനത്തിൽ ആരാധകർ വലിയ നിരാശരാണ്.നിരവധി സൂപ്പർതാരങ്ങൾ ഉണ്ടായിട്ടും അതിനോട് നീതിപുലർത്തുന്ന രൂപത്തിലുള്ള പ്രകടനം ഇതുവരെ പുറത്തെടുക്കാൻ റയൽ മാഡ്രിഡിനെ കഴിഞ്ഞിട്ടില്ല. അതുകൊണ്ടുതന്നെ എക്സിലൂടെ ആരാധകർ വലിയ പ്രതിഷേധം ഉയർത്തുന്നുണ്ട്. ആരാധകരുടെ ചില പോസ്റ്റുകൾ ഗോൾ ഡോട്ട് കോം റിപ്പോർട്ട് ചെയ്തിട്ടുണ്ട്.അതൊന്ന് പരിശോധിക്കാം.
” ഈ സീസണിൽ കളിച്ച എല്ലാ മത്സരങ്ങളിലും എതിരാളികൾ റയൽ മാഡ്രിഡിനെ നിഷ്പ്രഭരാക്കി കളഞ്ഞു ” എന്നാണ് ഒരു ആരാധകൻ അഭിപ്രായപ്പെട്ടിട്ടുള്ളത്.
” നിലവിൽ റയൽ മാഡ്രിഡ് ഒരു മികച്ച ടീമല്ല.വളരെ വലുതാണെങ്കിലും ഒരു ടീം എന്ന നിലയിൽ റയൽ മാഡ്രിഡ് മോശമാണ് “എന്നാണ് മറ്റൊരു ആരാധകൻ അഭിപ്രായപ്പെട്ടിട്ടുള്ളത്.
” ലോകത്തെ ഏറ്റവും മികച്ച താരത്തെ സൈൻ ചെയ്തവരാണ് റയൽ മാഡ്രിഡ്, എന്നിട്ട് അവർ ഒരു മോശം ടീമായി മാറി ” ഇതാണ് മറ്റൊരു ആരാധകൻ എംബപ്പേയെ ലക്ഷ്യം വെച്ചുകൊണ്ട് അഭിപ്രായപ്പെട്ടിട്ടുള്ളത്.
” ഈ കാണുന്നതൊന്നും എനിക്ക് വിശ്വസിക്കാൻ കഴിയുന്നില്ല. റയൽ മാഡ്രിഡ് പാടെ തകർന്നിരിക്കുന്നു ” എന്നാണ് മറ്റൊരു ആരാധകൻ പറഞ്ഞിട്ടുള്ളത്.ഇങ്ങനെ പലവിധ അഭിപ്രായങ്ങളും നമുക്ക് എക്സിൽ കാണാൻ സാധിക്കുന്നതാണ്.
നിലവിൽ ചാമ്പ്യൻസ് ലീഗിൽ റയൽ മാഡ്രിഡിന്റെ അവസ്ഥ പരിതാപകരമാണ്.4 മത്സരങ്ങൾ കളിച്ചിട്ട് രണ്ട് വിജയങ്ങൾ മാത്രമാണ് അവർക്ക് നേടാൻ കഴിഞ്ഞിട്ടുള്ളത്.പതിനേഴാം സ്ഥാനത്താണ് റയൽ മാഡ്രിഡ് ഉള്ളത്.ഇനി അടുത്ത ചാമ്പ്യൻസ് ലീഗ് മത്സരത്തിൽ കരുത്തരായ ലിവർപൂളാണ് റയൽ മാഡ്രിഡിന്റെ എതിരാളികൾ.
