ബനേഗയുടെ അസിസ്റ്റ്, ഒകംപസിൻ്റെ ഗോൾ: സെവിയ്യ സെമിയിൽ

സെവിയ്യ യൂറോപ്പ ലീഗിൻ്റെ സെമി ഫൈനലിൽ പ്രവേശിച്ചു. ഇന്ന് പുലർച്ചെ നടന്ന ക്വോർട്ടർ ഫൈനൽ മത്സരത്തിൽ അവർ വേൾവ്സിനെ ഏകപക്ഷീയമായ ഒരു ഗോളിന് മറികടന്നു. അർജൻ്റയ്ൻ സൂപ്പർ താരം ലൂകാസ് ഒകംപസാണ് സെവിയ്യയുടെ വിജയ ഗോൾ നേടിയത്. സെമി ഫൈനലിൽ മാഞ്ചസ്റ്റർ യുണൈറ്റഡിനെയാണ് അവർക്ക് നേരിടേണ്ടത്.

MSV അറീനയിൽ നടന്ന മത്സരത്തിൽ സെവിയ്യ തന്നെയാണ് ആധിപത്യം പുലർത്തിയത്. മത്സരത്തിൻ്റെ തുടക്കത്തിൽ ലഭിച്ച പെനാൽറ്റി ഗോളാക്കി മാറ്റാൻ കഴിയാതെ പോയത് വോൾവ്സിന് വലിയ തിരിച്ചടിയാവുകയും ചെയ്തു. കളിയുടെ പത്താം മിനുട്ടിൽ പന്തുമായി കുതിച്ചു പാഞ്ഞ അഡാമ ട്രയോറയെ ഡിയേഗോ കാർലോസ് പെനാൽറ്റി ബോക്സിൽ വീഴ്ത്തിയതിന് റഫറി പെനാൽറ്റി വിധിക്കുകയായിരുന്നു. കിക്കെടുത്ത ഹിമിനസിന് അത് കൺവേർട്ട് ചെയ്യാൻ കഴിഞ്ഞില്ല. മത്സരത്തിൻ്റെ എൺപത്തിയെട്ടാം മിനുട്ടിലാണ് സെവിയ്യയുടെ വിജയഗോൾ പിറന്നത്. കോർണറിൽ നിന്നും വന്ന പന്ത് എവർ ബനേഗ ബോക്സിലേക്ക് ഉയർത്തി നൽകിയപ്പോൾ ഒകംപസ് കിടിലൻ ഹെഡ്ഡറിലൂടെ പന്ത് വലയിലാക്കുകയായിരുന്നു.

ഈ വിജയത്തോടെ സെവിയ്യയുടെ അൺബീറ്റൺ റൺ പത്തൊമ്പതാം മത്സരത്തിലേക്ക് കടന്നു (10W, 9D). എല്ലാ കോംപിറ്റീഷനുകളിലുമായി അവസാന 8 മത്സരങ്ങളിൽ 7 മത്സരങ്ങളും വിജയിച്ച അവർ (7W,1D) തുടർച്ചയായ 5 ക്ലീൻ ഷീറ്റുകളും സ്വന്തമാക്കി. ആറാം യൂറോപ്യൻ കിരീടം ലക്ഷ്യമിടുന്ന സെവിയ്യ യൂറോപ്പ ലീഗിൽ 40 വിജയങ്ങളും നേടിക്കഴിഞ്ഞു.