പ്രതീക്ഷ ക്രിസ്റ്റ്യാനോയുടെ ബൂട്ടുകളിൽ, ലിയോണിനെ മറികടക്കാൻ യുവന്റസ് ഇറങ്ങുന്നു !

ഒരിക്കൽ കൂടി ക്രിസ്റ്റ്യാനോ റൊണാൾഡോയുടെ ബൂട്ടുകളിൽ പ്രതീക്ഷ അർപ്പിച്ചു കൊണ്ട് യുവന്റസ് ചാമ്പ്യൻസ് ലീഗിന്റെ കളത്തിലേക്കിറങ്ങുകയാണ്. ചാമ്പ്യൻസ് ലീഗിന്റെ പ്രീക്വാർട്ടറിലെ രണ്ടാം പാദമത്സരത്തിൽ ഫ്രഞ്ച് ശക്തികളായ ലിയോണിനെയാണ് യുവന്റസ് നേരിടുന്നത്. ഇന്ന് രാത്രി ഇന്ത്യൻ സമയം 12:30 നാണ് സ്വന്തം മൈതാനത്ത് യുവന്റസ് ജയം മാത്രം ലക്ഷ്യം വെച്ചിറങ്ങുന്നത്. കാരണം ആദ്യപാദത്തിൽ ഒരു ഗോളിന് ലിയോണിനോട് തോൽക്കാനായിരുന്നു യുവന്റസിന്റെ യോഗം. ഇതിനാൽ തന്നെ സമനില പോലും പുറത്തേക്കുള്ള വഴി ചൂണ്ടികാണിച്ചു തരുമെന്നിരിക്കെ ജയം മാത്രമാണ് മുന്നേറാനുള്ള യുവന്റസിന്റെ ഏകമാർഗം. അതിനാൽ തന്നെ പ്രതീക്ഷകൾ മുഴുവനും ക്രിസ്റ്റ്യാനോ റൊണാൾഡോയുടെ ബൂട്ടുകളിൽ ആണ്.

പൌലോ ദിബാല, ഡഗ്ലസ് കോസ്റ്റ എന്നിവരുടെ പരിക്കുകൾ യുവന്റസിന് വലിയ തിരിച്ചടി തന്നെയാണ്. ബെർണാഡ്ഷി, ഹിഗ്വയ്‌ൻ എന്നിവരായിരിക്കും റൊണാൾഡോക്കൊപ്പം അറ്റാക്കിങ് നിരയെ നയിക്കുക. തന്റെ പ്രതീക്ഷകൾ മുഴുവനും ക്രിസ്റ്റ്യാനോ റൊണാൾഡോയിൽ ആണെന്ന് ഗോൾകീപ്പർ സെസ്നി തുറന്നു പറഞ്ഞിരുന്നു. നിർണായകഘട്ടത്തിൽ ക്രിസ്റ്റ്യാനോ വ്യത്യസ്ഥകൾ സൃഷ്ടിക്കുമെന്നും മറ്റൊരു അത്ഭുതപ്രകടനത്തിനായി അദ്ദേഹം തയ്യാറായിരിക്കുന്നു എന്നുമാണ് ഗോൾകീപ്പർ സെസ്നി റൊണാൾഡോയെ കുറിച്ച് പറഞ്ഞത്. മുൻപ് അത്ലറ്റികോ മാഡ്രിഡിനെതിരെ ക്രിസ്റ്റ്യാനോ റൊണാൾഡോ പുറത്തെടുത്ത പോലെയൊരു പ്രകടനമാണ് സെസ്നിയും റൊണാൾഡോയും പ്രതീക്ഷിച്ചിരുന്നത്. ഗോൾഡൻ ബൂട്ടും എംവിപിയും കൈവിട്ടു പോയെങ്കിലും സീസണിൽ മികച്ച ഫോമിൽ തന്നെയാണ് റൊണാൾഡോ കളിക്കുന്നത്. ലീഗ് ആരംഭിച്ച ശേഷം 11 മത്സരങ്ങളിൽ നിന്ന് 10 ഗോളുകൾ നേടാൻ റൊണാൾഡോക്ക് കഴിഞ്ഞിട്ടുണ്ട്. അതിന് മുമ്പത്തെ പതിനൊന്ന് മത്സരങ്ങളിൽ 16 ഗോളുകൾ അടിച്ചു കൂട്ടിയിരുന്നു. ലിയോണിന് ആശ്വാസമാവുന്ന ഏകഘടകം ഒരു ഗോളിന്റെ ലീഡ് മാത്രമാണ്. എന്നാൽ ക്രിസ്റ്റ്യാനോ റൊണാൾഡോ യഥാർത്ഥ ഫോം കണ്ടെത്തിയാൽ ലിയോൺ ഒന്ന് പാടുപെടേണ്ടി വരും. ഏതായാലും റൊണാൾഡോ മായുടെ ഭാഗത്ത് നിന്നും ഒരു മികച്ച പ്രകടനം പ്രതീക്ഷിച്ച് ഇരിക്കുകയാണ് ആരാധകർ.