നറുക്കിടുമോ എന്നറിയില്ല,പിഎസ്ജിയുടെ പെനാൽറ്റി ആരെടുക്കും? ഹെരേര പറയുന്നു!

ഈ സീസണിൽ മികച്ച ഫോമിലാണ് പിഎസ്ജിയുടെ മധ്യനിര താരമായ ആൻഡർ ഹെരേര കളിച്ചു കൊണ്ടിരിക്കുന്നത്. കഴിഞ്ഞ ക്ലബ് ബ്രൂഗെക്കെതിരെയുള്ള മത്സരത്തിൽ പിഎസ്ജിയുടെ ഗോൾ നേടിയത് ഹെരേരയായിരുന്നു. ഈ സീസണിൽ ഏഴ് മത്സരങ്ങളിൽ നിന്ന് 4 ഗോളുകൾ ഇതിനോടകം നേടാൻ താരത്തിന് സാധിച്ചിരുന്നു. ഏതായാലും കഴിഞ്ഞ ദിവസം താരം സ്പാനിഷ് മാധ്യമമായ മാർക്കക്ക്‌ ഒരു ഇന്റർവ്യൂ നൽകിയിരുന്നു. നിരവധി കാര്യങ്ങളെ കുറിച്ച് ഈ ഇന്റർവ്യൂവിൽ സംസാരിച്ചിരുന്നു. കൂട്ടത്തിൽ പിഎസ്ജിയിൽ പെനാൽറ്റി ആരെടുക്കുമെന്ന ഒരു ചോദ്യമുണ്ടായിരുന്നു. വളരെ തമാശ രൂപേണയാണ് താരം ഇതിന് മറുപടി നൽകിയത്.എന്തൊക്കെയായാലും താൻ പെനാൽറ്റി എടുക്കാൻ പോവുന്നില്ലെന്നും മെസ്സി, നെയ്മർ, എംബപ്പേ എന്നിവർ പെനാൽറ്റിക്ക്‌ വേണ്ടി നറുക്കിടുമോ എന്ന കാര്യം തനിക്കറിയില്ല എന്നുമാണ് ഹെരേര അറിയിച്ചിട്ടുള്ളത്. യഥാർത്ഥത്തിൽ അതിന് വേണ്ടി ഒരാളെ നിയോഗിച്ചിട്ടില്ലെന്നും ഹെരേര കൂട്ടിച്ചേർത്തു.

” സത്യം എന്തെന്നാൽ പെനാൽറ്റി ആര് എടുക്കണമെന്നുള്ളത് നിയോഗിക്കപ്പെട്ടിട്ടില്ല. അതിനെ കുറിച്ച് ഞങ്ങൾ ഇതുവരെ സംസാരിച്ചിട്ടുമില്ല. ഏതായാലും ഞാൻ പെനാൽറ്റി എടുക്കാൻ പോവുന്നൊന്നുമില്ല.അക്കാര്യം മാത്രമാണ് എനിക്കുറപ്പുള്ളത്.പെനാൽറ്റി ആര് എടുക്കുമെന്നുള്ളത് ഒരു പ്രശ്നമാവുമെന്ന് എനിക്ക് തോന്നുന്നില്ല. എന്തെന്നാൽ നെയ്മറും മെസ്സിയും എംബപ്പേയും വളരെ മികച്ച ബന്ധമാണ് വെച്ച് പുലർത്തുന്നത്.ഇനിയിപ്പോ അവർ മൂന്ന് പേരും നറുക്കിടുമോ എന്നുള്ള കാര്യവും തനിക്കറിയില്ല.യഥാർത്ഥത്തിൽ എനിക്കിപ്പോൾ അതേ കുറിച്ച് ഐഡിയയില്ല ” ഇതാണ് ഹെരേര നർമ്മത്തിൽ ചാലിച്ചു കൊണ്ട് പറഞ്ഞിരിക്കുന്നത്.

ഏതായാലും ഇന്ന് ലീഗ് വണ്ണിൽ പിഎസ്ജി കളത്തിലേക്കിറങ്ങുന്നുണ്ട്.ഇന്ന് രാത്രി ഇന്ത്യൻ സമയം 12:15-ന് ലിയോണിനെയാണ് പിഎസ്ജി നേരിടുക.