ഞങ്ങൾ ഒരു സ്പെഷ്യൽ ടീമാണ്: ഫ്ലിക്ക് വിശദീകരിക്കുന്നു!
ഇന്നലെ യുവേഫ ചാമ്പ്യൻസ് ലീഗിൽ നടന്ന മത്സരത്തിൽ ഗംഭീര വിജയമാണ് ബാഴ്സലോണ സ്വന്തമാക്കിയിട്ടുള്ളത്.വൈരികളായ ബയേണിനെ ഒന്നിനെതിരെ നാലു ഗോളുകൾക്കാണ് ബാഴ്സ പരാജയപ്പെടുത്തിയിട്ടുള്ളത്. ബ്രസീലിയൻ സൂപ്പർതാരമായ റാഫിഞ്ഞയുടെ ഹാട്രിക്കാണ് ബാഴ്സക്ക് ഈയൊരു തകർപ്പൻ വിജയം സമ്മാനിച്ചത്. ശേഷിച്ച ഗോൾ റോബർട്ട് ലെവന്റോസ്ക്കിയുടെ വകയായിരുന്നു. ഒരു വലിയ ഇടവേളക്ക് ശേഷമാണ് ഇപ്പോൾ ബാഴ്സ ബയേണിനെതിരെ വിജയം സ്വന്തമാക്കുന്നത്.
പരിശീലകനായ ഹാൻസി ഫ്ലിക്കിന് കീഴിൽ ഗംഭീര പ്രകടനമാണ് ബാഴ്സ നടത്തിക്കൊണ്ടിരിക്കുന്നത്. കൂടാതെ ലാ മാസിയയിലെ യുവതാരങ്ങളെ ഫലപ്രദമായി ഉപയോഗപ്പെടുത്താൻ ഫ്ലിക്കിന് സാധിക്കുകയും ചെയ്യുന്നുണ്ട്. നിലവിൽ ബാഴ്സ ഒരു സ്പെഷ്യൽ ടീം ആണെന്നും അതിന്റെ കാരണം ലാ മാസിയയാണ് എന്നും ഫ്ലിക്ക് ഇന്നലത്തെ വിജയത്തിന് ശേഷം പറഞ്ഞിട്ടുണ്ട്. അദ്ദേഹത്തിന്റെ വാക്കുകൾ നോക്കാം.
” ഞങ്ങൾ ഒരു സ്പെഷ്യൽ ടീമാണ്. കാരണം ലാ മാസിയ വലിയ രൂപത്തിൽ സ്വാധീനം ചെലുത്തുന്നുണ്ട്.താരങ്ങളുടെ ബന്ധങ്ങളിൽ വലിയ സ്വാധീനം ചെലുത്താൻ ലാ മാസിയക്ക് സാധിക്കുന്നുണ്ട്. അവർ അവിടെ കളിച്ചു വളർന്നതുകൊണ്ടുതന്നെ നല്ല പരസ്പര ധാരണ അവർക്കിടയിൽ ഉണ്ട്.വളരെ ആസ്വദിച്ചു കൊണ്ടാണ് ഞങ്ങൾ ഇപ്പോൾ കളിക്കുന്നത്.ലാ മാസിയ എന്ന അക്കാദമിയുടെ പ്രാധാന്യം ഞാൻ ഇതിനു മുൻപും ഒരുപാട് തവണ പറഞ്ഞതാണ് ” ഇതാണ് ഫ്ലിക്ക് പറഞ്ഞിട്ടുള്ളത്.
ഇന്നലത്തെ സ്റ്റാർട്ടിങ് ഇലവനിൽ 6 താരങ്ങൾ ലാ മാസിയയിലൂടെ വളർന്നുവന്ന താരങ്ങളായിരുന്നു. മാത്രമല്ല മത്സരം അവസാനിക്കുന്ന സമയത്ത് 8 ലാ മാസിയ താരങ്ങൾ കളിക്കളത്തിൽ ഉണ്ടാവുകയും ചെയ്തിരുന്നു. ഈ യുവ താരങ്ങളുടെ മികവിലാണ് ഇപ്പോൾ ബാഴ്സ ഗംഭീര പ്രകടനം നടത്തിക്കൊണ്ടിരിക്കുന്നത്.ഇനി എൽ ക്ലാസിക്കോ മത്സരമാണ് അവരെ കാത്തിരിക്കുന്നത്.
