എംബപ്പേയെ ട്രോളി ന്യൂകാസിൽ,ട്രെന്റിങായി മൂട്ട എംബപ്പേ..!

കഴിഞ്ഞ ദിവസം യുവേഫ ചാമ്പ്യൻസ് ലീഗിൽ നടന്ന മത്സരത്തിൽ ഒരു നാണംകെട്ട തോൽവി ഫ്രഞ്ച് വമ്പൻമാരായ പിഎസ്ജിക്ക് ഏറ്റുവാങ്ങേണ്ടി വന്നിരുന്നു. ഒന്നിനെതിരെ നാലു ഗോളുകൾക്കായിരുന്നു ന്യൂകാസിൽ യുണൈറ്റഡ് അവരെ പരാജയപ്പെടുത്തിയത്. സൂപ്പർ താരം കിലിയൻ എംബപ്പേ ഉൾപ്പെടെയുള്ള വമ്പൻ താരങ്ങൾ കളിച്ചിട്ടും പിഎസ്ജി നാണം കെടുകയായിരുന്നു. മത്സരത്തിൽ എംബപ്പേക്ക് കാര്യമായി ഒന്നും ചെയ്യാൻ സാധിച്ചിരുന്നില്ല.

ഇതിന് പിന്നാലെ ന്യൂകാസിൽ യുണൈറ്റഡ് എംബപ്പേയെ പരിഹസിച്ചുകൊണ്ട് ഒരു പോസ്റ്റ് പങ്കുവെച്ചിട്ടുണ്ട്.ന്യൂകാസിൽ യുണൈറ്റഡ് താരങ്ങളായ ഡാൻ ബേൺ,ഫാബിയാൻ ഷാർ എന്നിവർക്കൊപ്പം കിലിയൻ എംബപ്പേ നിൽക്കുന്ന ചിത്രമാണ് അവർ പോസ്റ്റ് ചെയ്തിട്ടുള്ളത്.ഇന്നലത്തെ ചാമ്പ്യൻസ് ലീഗ് മത്സരത്തിൽ ഗോൾ നേടിയ രണ്ടു താരങ്ങൾ എന്ന ക്യാപ്ഷനാണ് അവർ നൽകിയിരിക്കുന്നത്. അതായത് എംബപ്പേക്ക് ഗോൾ നേടാനാവാത്തതിനെയാണ് ഇവർ പരിഹസിച്ചിട്ടുള്ളത്. മാത്രമല്ല ന്യൂകാസിലിന്റെ രണ്ട് താരങ്ങളും പ്രതിരോധ നിരക്കാരായിരുന്നു എന്നത് കൂടി ചേർത്ത് വായിക്കേണ്ട കാര്യമാണ്.

ഇതിനിടെ എംബപ്പേയെ പരിഹസിച്ചു കൊണ്ടുള്ള മറ്റൊരു കാര്യവും ട്രെന്റിങായിട്ടുണ്ട്. അതായത് ഫ്രാൻസിൽ മൂട്ട ശല്യം രൂക്ഷമായ ഒരു സന്ദർഭമാണിത്.എന്നാൽ ന്യൂകാസിൽ യുണൈറ്റഡ് ആരാധകർ ഇത് എംബപ്പേയെ പരിഹസിക്കാൻ ഉപയോഗപ്പെടുത്തിയിട്ടുണ്ട്.ബെഡ്ബഗ് എംബപ്പേ അഥവാ മൂട്ട എംബപ്പേ എന്ന ഒരു ഇരട്ട പേരാണ് അവർ നൽകിയിരിക്കുന്നത്. സോഷ്യൽ മീഡിയയിൽ ഇത് വളരെയധികം പ്രചരിക്കുകയും ചെയ്തു. തോൽവിയോട് കൂടി വൻ ട്രോളുകളാണ് എംബപ്പേക്ക് ഇപ്പോൾ ലഭിച്ചുകൊണ്ടിരിക്കുന്നത്.

മെസ്സി, നെയ്മർ എന്നിവരുടെ ആരാധകരും ഇതിൽ സജീവമാണ്. നേരത്തെ പിഎസ്ജിയുടെ തോൽവികൾക്ക് ഏറ്റവും കൂടുതൽ പഴി കേൾക്കേണ്ടി വന്ന താരങ്ങളാണ് മെസ്സിയും നെയ്മറും. എന്നാൽ 2 പേരും ക്ലബ്ബ് വിട്ടതോടെ വിമർശനങ്ങൾ ഒറ്റയ്ക്ക് ഏൽക്കേണ്ടി വരുന്നത് എംബപ്പേക്കാണ്. അത് എംബപ്പേ അർഹിക്കുന്നതാണ് എന്നാണ് പല വിമർശകരും പറയുന്നത്.