ഇന്ന് മിന്നും ഫോമിൽ,പിഎസ്ജിയോട് പ്രതികാരം തീർക്കാൻ ചോപോ മോട്ടിങ്ങിന് സാധിക്കുമോ?

ഇന്ന് യുവേഫ ചാമ്പ്യൻസ് ലീഗിൽ നടക്കുന്ന പ്രീ ക്വാർട്ടർ പോരാട്ടത്തിൽ പിഎസ്ജിയുടെ എതിരാളികൾ ബയേൺ മ്യൂണിക്കാണ്. ഇന്ന് രാത്രി ഇന്ത്യൻ സമയം 1:30നാണ് ഈയൊരു മത്സരം നടക്കുക.പിഎസ്ജിയുടെ മൈതാനമായ പാർക്ക് ഡെസ് പ്രിൻസസാണ് ഈ ആദ്യപാദ മത്സരത്തിന് വേദിയാവുക.

ഈ മത്സരത്തിൽ ഏവരും ഉറ്റുനോക്കുന്ന ഒരു എറിക്ക് മാക്സിം ചോപോ മോട്ടിങ്ങാണ്.2018-ലായിരുന്നു ഇദ്ദേഹം പിഎസ്ജിയിലേക്ക് എത്തിയിരുന്നത്.എന്നാൽ ക്ലബ്ബിൽ അവസരങ്ങൾ കുറവായിരുന്നു. മാത്രമല്ല സ്വന്തം ആരാധകരിൽ നിന്നുപോലും പരിഹാസങ്ങൾ ഈ കാമറൂൺ താരത്തിന് ഏൽക്കേണ്ടി വന്നിരുന്നു.യുവേഫ ചാമ്പ്യൻസ് ലീഗിനുള്ള സ്‌ക്വാഡിൽ അദ്ദേഹത്തെ രജിസ്റ്റർ ചെയ്യാതെ പിഎസ്ജി മാറ്റിനിർത്തിയ ഒരു കാലമുണ്ടായിരുന്നു. ഈ ബുദ്ധിമുട്ടുകൾ എല്ലാം അനുഭവിച്ചതിനു ശേഷമാണ് അദ്ദേഹം ബയേണിൽ എത്തിയത്.

2020 ലായിരുന്നു ചോപോ മോട്ടിങ്‌ ബയേണിന്റെ താരമായത്. ആ സീസണിൽ അദ്ദേഹത്തിന് അവസരങ്ങൾ കുറവായിരുന്നു. തന്റെ പൊസിഷനിലെ തേർഡ് ചോയ്സ് മാത്രമായിരുന്നു ചോപോ മോട്ടിങ്.എന്നിട്ട് പോലും ആ സീസണിൽ അദ്ദേഹം 9 ഗോളുകൾ നേടി.മനോഹരമായ മറ്റൊരു ഓർമ്മ അവിടെ അദ്ദേഹത്തിന് ഉണ്ടായിരുന്നു. ചാമ്പ്യൻസ് ലീഗിൽ അദ്ദേഹം 2021-ൽ തന്റെ മുൻ ക്ലബ്ബായ പിഎസ്ജിക്കെതിരെ രണ്ട് പാദങ്ങളിലുമായി രണ്ട് ഗോളുകൾ അദ്ദേഹം നേടിയിരുന്നു. എന്നിരുന്നാലും മുന്നോട്ടു പോവാൻ ബയേണിന് സാധിച്ചിരുന്നില്ല. എന്നിരുന്നാലും അദ്ദേഹത്തിന്റെ കരാർ പുതുക്കാൻ ബയേൺ തയ്യാറാവുകയായിരുന്നു.

കഴിഞ്ഞ സമ്മർ ട്രാൻസ്ഫർ വിൻഡോയിലാണ് റോബർട്ട് ലെവന്റോസ്ക്കി ബയേൺ വിട്ടത്.ഇതോടുകൂടി കൂടുതൽ അവസരങ്ങൾ ഈ കാമറൂൺ താരത്തിന് ലഭിക്കുകയായിരുന്നു. അത് മുതലെടുക്കാനും മോട്ടിങ്ങിന് സാധിച്ചു.ഈ സീസണിൽ ആകെ കളിച്ച 21 മത്സരങ്ങളിൽ നിന്ന് 13 ഗോളുകളും നാല് അസിസ്റ്റുകളും ഈ താരം നേടിയിട്ടുണ്ട്.താരത്തിന്റെ ഈ മിന്നും പ്രകടനം ഇന്ന് പിഎസ്ജിക്ക് വെല്ലുവിളിയാവാൻ സാധ്യതയുണ്ട്. തനിക്ക് അർഹിച്ച പരിഗണന നൽകാൻ തയ്യാറാവാത്ത ക്ലബ്ബിനോട് പ്രതികാരം ചെയ്യാൻ മോട്ടിങ്ങിന് സാധിക്കുമോ എന്നുള്ളത് ആരാധകർ നോക്കുന്ന കാര്യമാണ്.