ഇതിന് വേണ്ടിയാണ് ഞാൻ തിരിച്ചു വന്നത്, ആവേശവിജയത്തിന് ശേഷം ക്രിസ്റ്റ്യാനോ പറയുന്നു!

ഇന്നലെ ചാമ്പ്യൻസ് ലീഗിൽ നടന്ന മത്സരത്തിൽ ഒന്നിനെതിരെ രണ്ട് ഗോളുകൾക്കായിരുന്നു മാഞ്ചസ്റ്റർ യുണൈറ്റഡ് വിയ്യാറയലിനെ പരാജയപ്പെടുത്തിയത്. മത്സരത്തിൽ ഒരു ഗോളിന് പിറകിൽ നിന്നെങ്കിലും യുണൈറ്റഡ് വിജയം നേടിയെടുക്കുകയായിരുന്നു. മത്സരത്തിന്റെ അവസാന നിമിഷം ഗോൾ നേടിക്കൊണ്ട് സൂപ്പർ താരം ക്രിസ്റ്റ്യാനോ റൊണാൾഡോ ഓൾഡ് ട്രഫോഡിൽ ഹീറോയായി മാറുകയായിരുന്നു.ഏതായാലും ഈ മത്സരത്തിന് ശേഷം വളരെ സന്തോഷത്തോടെയാണ് ക്രിസ്റ്റ്യാനോ റൊണാൾഡോ സംസാരിച്ചത്.ഇതിന് വേണ്ടിയാണ് താൻ യുണൈറ്റഡിലേക്ക് തിരിച്ചെത്തിയതെന്നും ഒരിക്കൽ കൂടി തനിക്ക് യുണൈറ്റഡിൽ ചരിത്രം കുറിക്കണമെന്നുമാണ് റൊണാൾഡോ അറിയിച്ചത്. മത്സരശേഷം ബിട്ടി സ്പോർട്സിനോട് സംസാരിക്കുകയായിരുന്നു അദ്ദേഹം.

” ഇതിന് വേണ്ടിയാണ് ഞാൻ തിരികെ വന്നത്.ഞാൻ ഈ ക്ലബ്ബിനെ നന്നായി മിസ് ചെയ്തിരുന്നു.ഈ ക്ലബ്ബിൽ ചരിത്രം കുറിച്ച താരമാണ് ഞാൻ. എനിക്ക് അതൊരിക്കൽ കൂടി ചെയ്യണമായിരുന്നു.ഈ ആരാധകകൂട്ടത്തിന് ഞാൻ നന്ദി പറയുന്നു. എന്റെ കാര്യത്തിൽ മാത്രമല്ല, ഈ ടീമിന് നൽകുന്ന പിന്തുണക്ക്‌ കൂടി നന്ദി പറയുന്നു.ഇന്നത്തെ മത്സരത്തിൽ മൂന്ന് പോയിന്റുകൾ ലഭിച്ചില്ലായിരുന്നുവെങ്കിൽ ഞങ്ങൾക്ക്‌ മുന്നോട്ട് പോവാൻ ബുദ്ധിമുട്ട് ഉണ്ടാവുമായിരുന്നു.പക്ഷേ ഇപ്പോൾ എല്ലാം സാധ്യമാണ്. മുന്നോട്ട് പോവാൻ കഴിയുമെന്ന് തന്നെയാണ് ഞങ്ങൾ വിശ്വസിക്കുന്നത് ” ക്രിസ്റ്റ്യാനോ റൊണാൾഡോ പറഞ്ഞു.