അടുത്ത തവണ ലെവന്റോസ്ക്കി ഗോളടിച്ചിരിക്കും : പിന്തുണയുമായി ബാഴ്സ സഹതാരം!

ഇന്നലെ യുവേഫ ചാമ്പ്യൻസ് ലീഗിൽ നടന്ന കരുത്തരുടെ പോരാട്ടത്തിൽ ബാഴ്സ പരാജയം ഏറ്റുവാങ്ങിയിരുന്നു. എതിരില്ലാത്ത രണ്ട് ഗോളുകൾക്കാണ് ബയേൺ ബാഴ്സയെ പരാജയപ്പെടുത്തിയത്.ലുകാസ് ഹെർണാണ്ടസ്,ലിറോയ് സാനെ എന്നിവരാണ് ബയേണിന്റെ ഗോളുകൾ നേടിയത്. മത്സരത്തിന്റെ ആദ്യപകുതിയിൽ ബാഴ്സ മികച്ച പ്രകടനം നടത്തിയപ്പോൾ രണ്ടാം പകുതിയിൽ ബയേൺ തിരികെ വരികയായിരുന്നു.

മത്സരത്തിൽ നിരവധി ഗോളവസരങ്ങൾ ബാഴ്സ സൂപ്പർ താരമായ റോബർട്ട് ലെവൻഡോസ്ക്കി നഷ്ടമാക്കി കളഞ്ഞിരുന്നു. പ്രത്യേകിച്ച് ആദ്യ പകുതിയിലായിരുന്നു സുവർണ്ണാവസരങ്ങൾ ലെവന്റോസ്ക്കി നഷ്ടപ്പെടുത്തിയത്. ഇപ്പോഴിതാ താരത്തിന് പിന്തുണയുമായി ബാഴ്സ സഹതാരമായ ജൂലെസ് കൂണ്ടെ രംഗത്ത് വന്നിട്ടുണ്ട്. അടുത്ത തവണ ബയേണിനെതിരെ ലെവന്റോസ്ക്കി ഗോളടിക്കുമെന്നാണ് കൂണ്ടെ പറഞ്ഞിട്ടുള്ളത്.മത്സരശേഷം അദ്ദേഹം പറഞ്ഞ വാക്കുകൾ ഇങ്ങനെയാണ്.

“ലെവന്റോസ്ക്കി ഈ മത്സരത്തിൽ ചില അവസരങ്ങൾ പാഴാക്കിയിട്ടുണ്ട്.പക്ഷേ അടുത്ത മത്സരത്തിൽ അദ്ദേഹം അതിനു പകരമായി കൊണ്ട് ഗോളുകൾ നേടുക തന്നെ ചെയ്യും.ഞങ്ങൾ വളരെ മികച്ച രൂപത്തിലാണ് ഈ മത്സരത്തിൽ പോരാടിയത്.പക്ഷേ ഗോളുകളുടെ അഭാവമാണ് ഞങ്ങൾക്ക് വിനയായത്.മാത്രമല്ല ആ കോർണർ കിക്കിൽ ഞങ്ങൾക്ക് നിയന്ത്രണം നഷ്ടമായി. പിറകെ രണ്ടാമത്തെ ഗോൾ ഞങ്ങൾക്ക് വഴങ്ങേണ്ടി വന്നതും വലിയ തിരിച്ചടിയായി ” ഇതാണ് ഡിഫൻഡറായ കൂണ്ടെ പറഞ്ഞിട്ടുള്ളത്.

ഇനി ക്യാമ്പ് നൗവിൽ വെച്ച് ഒരു തവണ കൂടി ബാഴ്സ ബയേണിനെ നേരിടും.ബയേണിനേതിരെ തിളങ്ങാൻ കഴിഞ്ഞിട്ടില്ലെങ്കിലും 9 ഗോളുകൾ നേടി കൊണ്ട് ഈ സീസണിൽ ലെവന്റോസ്ക്കി മികച്ച പ്രകടനം തന്നെയാണ് പുറത്തെടുക്കുന്നത്.