എംബപ്പേയുടെ സ്ഥാനത്തേക്ക് ഗ്യോക്കേറസിനെ കൊണ്ടുവരൂ : റയൽ മാഡ്രിഡിനോട് ഒ ഹാര

ഫ്രഞ്ച് സൂപ്പർ താരമായ കിലിയൻ എംബപ്പേ നിലവിൽ റയൽ മാഡ്രിഡിന് വേണ്ടിയാണ് കളിച്ചുകൊണ്ടിരിക്കുന്നത്. നമ്പർ നയൻ പൊസിഷനിലാണ് അദ്ദേഹം കളിക്കുന്നത്. എന്നാൽ സെന്റർ സ്ട്രൈക്കർ പൊസിഷനിൽ തിളങ്ങാൻ അദ്ദേഹത്തിന് കഴിയുന്നില്ല.അതുകൊണ്ടുതന്നെ വലിയ രൂപത്തിലുള്ള വിമർശനങ്ങൾ താരത്തിന് ഏൽക്കേണ്ടി വരുന്നുണ്ട്. നിലവിൽ ഒരുപാട് ഗോളുകൾ നേടുന്ന ഒരു മികച്ച സ്ട്രൈക്കർ ശരിക്കും റയൽ മാഡ്രിഡ് മിസ് ചെയ്യുന്നുണ്ട്.എംബപ്പേ അത് വൈകാതെ തന്നെ പരിഹരിക്കും എന്നാണ് ആരാധകർ പ്രതീക്ഷിക്കുന്നത്.

മുൻ ഇംഗ്ലീഷ് താരമായ ജാമി ഒ ഹാര ഇക്കാര്യത്തിൽ റയലിന് ചില ഉപദേശങ്ങൾ നൽകിയിട്ടുണ്ട്. അതായത് എംബപ്പേയുടെ പൊസിഷനിലേക്ക് സ്പോട്ടിംഗ് സിപിയുടെ സ്വീഡിഷ് സൂപ്പർ സ്ട്രൈക്കറായ വിക്ടർ ഗ്യോക്കേറസിനെ കൊണ്ടുവരണം എന്നാണ് അദ്ദേഹം ആവശ്യപ്പെട്ടിട്ടുള്ളത്. വിക്ടറിനെ പോലെയുള്ള ഒരു സ്ട്രൈക്കറെയാണ് ഇപ്പോൾ റയൽ മാഡ്രിഡിന് ആവശ്യമെന്നും അദ്ദേഹം പറഞ്ഞിട്ടുണ്ട്.ജാമിയുടെ വാക്കുകൾ ഇങ്ങനെയാണ്.

” ലോകത്തുള്ള ഏത് ക്ലബ്ബും ഇപ്പോൾ വിക്ടറിനെ സ്വന്തമാക്കും.അദ്ദേഹം റയൽ മാഡ്രിഡിലേക്ക് പോകണം എന്നാണ് എന്റെ അഭിപ്രായം.റയൽ മാഡ്രിഡിന് നിലവിൽ ഒരു സെന്റർ ഫോർവേഡിനെ ആവശ്യമുണ്ട്.എംബപ്പേക്ക് അവിടെ തിളങ്ങാൻ കഴിയുന്നില്ല.അതുകൊണ്ടുതന്നെ അവർക്ക് ഇടിവ് സംഭവിച്ചിട്ടുണ്ട്.റയൽ വിക്ടറിനെയാണ് ഇപ്പോൾ സൈൻ ചെയ്യേണ്ടത്.ഹാലന്റിനെ പോലെ കളിക്കുന്ന താരമാണ് അദ്ദേഹം.വളരെ കരുത്തനാണ്,നല്ല ഫിസിക്കൽ ഉണ്ട്,നല്ല ഗോൾ സ്കോറർ ആണ്.ഡിഫൻഡർമാരെ നേരിടുന്നതിൽ അദ്ദേഹത്തിന് പേടിയുമില്ല.ഞാൻ ആ താരത്തെ ഇഷ്ടപ്പെടുന്നു. യൂറോപ്പിൽ എവിടെ കളിക്കാനും അദ്ദേഹത്തിനു കഴിയും ” ഇതാണ് ജാമി പറഞ്ഞിട്ടുള്ളത്.

ഗംഭീര പ്രകടനമാണ് താരം ഇപ്പോൾ നടത്തിക്കൊണ്ടിരിക്കുന്നത്. മാഞ്ചസ്റ്റർ സിറ്റിക്കെതിരെയുള്ള ചാമ്പ്യൻസ് ലീഗ് മത്സരത്തിൽ ഹാട്രിക്ക് നേടാൻ വിക്ടറിന് കഴിഞ്ഞിരുന്നു. എല്ലാ കോമ്പറ്റീഷനലുമായി 15 മത്സരങ്ങൾ കളിച്ച താരം 23 ഗോളുകൾ നേടി കഴിഞ്ഞു.മാഞ്ചസ്റ്റർ യുണൈറ്റഡ്,ബാഴ്സ തുടങ്ങിയ ടീമുകൾ അദ്ദേഹത്തിൽ താൽപര്യം പ്രകടിപ്പിച്ചിട്ടുണ്ട്.