അഴിക്കുള്ളിലും ഗോളടിച്ചുകൂട്ടി റൊണാൾഡീഞ്ഞോ

കുറച്ചു ദിവസങ്ങൾക്ക് മുൻപായിരുന്നു മുൻ ബ്രസീലിയൻ സൂപ്പർ താരം റൊണാൾഡീഞ്ഞോ വ്യാജപാസ്സ്പോർട്ടിന്റെ പേരിൽ പരാഗ്വൻ പോലീസിന്റെ പിടിയിലായത്. താരത്തിന് ജാമ്യം എടുക്കാനുള്ള ശ്രമങ്ങൾ നടത്തിയിരുന്നുവെങ്കിലും അതെല്ലാം വിഫലമാവുകയായിരുന്നു. ഇതോടെ താരം ജയിലിൽ കിടക്കേണ്ടി വരികയായിരുന്നു. എന്നാലിപ്പോൾ ജയിലിലും റൊണാൾഡീഞ്ഞോ ഗോളടിച്ചുകൂട്ടിയ വാർത്തകളാണ് ഇപ്പോൾ പുറത്തുവന്നിരിക്കുന്നത്. പരാഗ്വയിലെ എബിസി ടിവി ഇക്കാര്യം റിപ്പോർട്ട്‌ ചെയ്തിരിക്കുന്നത്.

പരാഗ്വൻ ജയിലിൽ തടവുകാർക്കിടയിൽ നടത്തപ്പെട്ട ടൂർണമെന്റിലാണ് റൊണാൾഡീഞ്ഞോ ഗോളുകളും അസിസ്റ്റുകളുമായി മിന്നിത്തിളങ്ങിയത്. ടൂർണമെന്റിൽ അഞ്ച് ഗോളും ആറ് അസിസ്റ്റുകളുമായിരുന്നു ഈ മുപ്പത്തിയൊൻപത്കാരന്റെ സമ്പാദ്യം. റൊണാൾഡീഞ്ഞോയുടെ മികവിൽ അദ്ദേഹത്തിന്റെ ടീം ടൂർണമെന്റ് ചാമ്പ്യൻമാരാവുകയും ചെയ്തു. ഒരു വിചിത്രസമ്മാനമായിരുന്നു വിജയികൾക്ക്‌ ലഭിച്ചത്. പതിനാറ് കിലോയോളം വരുന്ന പന്നിയാണ് റൊണാൾഡീഞ്ഞോക്കും സംഘത്തിനും സമ്മാനമായി ലഭിച്ചത്.