സർപ്രൈസ് ട്രാൻസ്ഫർ,ന്യൂകാസിൽ സൂപ്പർ താരം സൗദിയിലേക്ക്?

സമീപകാലത്ത് നിരവധി സൂപ്പർ താരങ്ങൾ സൗദി അറേബ്യൻ ഫുട്ബോളിലേക്ക് ചേക്കേറിയിട്ടുണ്ട്.എന്നാൽ സൗദി അവസാനിപ്പിക്കാൻ ഒരുക്കമല്ല. ഈ ട്രാൻസ്ഫർ വിൻഡോയിലും വരുന്ന സമ്മർ ട്രാൻസ്ഫർ വിൻഡോയിലും കൂടുതൽ താരങ്ങളെ സ്വന്തമാക്കാൻ അവർ ലക്ഷ്യം വെക്കുന്നുണ്ട്.സലാ,ഡി ബ്രൂയിന എന്നിവരെയൊക്കെയാണ് സൗദി അറേബ്യ ഇപ്പോൾ ഏറ്റവും കൂടുതൽ പരിഗണിക്കുന്നത്.

ഇതിനിടെ മറ്റൊരു സർപ്രൈസ് ട്രാൻസ്ഫറിന് സാധ്യതയുണ്ട്. എന്തെന്നാൽ ഇംഗ്ലീഷ് പ്രീമിയർ ലീഗ് ക്ലബ്ബായ ന്യൂകാസിൽ യുണൈറ്റഡിന്റെ പരാഗ്വൻ സൂപ്പർ താരമായ മിഗേൽ അൽമിറോൻ സൗദി അറേബ്യയിലേക്ക് ചേക്കേറിയേക്കും. യഥാർത്ഥത്തിൽ ന്യൂകാസിൽ യുണൈറ്റഡ് തന്നെയാണ് ഈ സൂപ്പർതാരത്തെ കൈവിടുന്നത്.പ്രമുഖ മാധ്യമപ്രവർത്തകനായ ബെൻ ജേക്കബ്സാണ് ഇക്കാര്യം റിപ്പോർട്ട് ചെയ്തിട്ടുള്ളത്.

പുതിയ താരങ്ങളെ കൊണ്ടുവരണമെങ്കിൽ ന്യൂകാസിൽ യുണൈറ്റഡിന് ഫണ്ട് ഉയർത്തേണ്ടതുണ്ട്. കാരണം സമീപകാലത്ത് ടാക്സിന്റെ പ്രശ്നത്തിൽ വലിയ നഷ്ടം ഈ ക്ലബ്ബിന് സംഭവിച്ചിരുന്നു. അതുകൊണ്ടുതന്നെ അൽമിറോണെ കൈവിടാൻ ഇവർ തയ്യാറായിട്ടുണ്ട്. സൗദി ക്ലബ്ബായ അൽ ശബാബുമായി ന്യൂകാസിൽ അഗ്രിമെന്റിൽ എത്തിക്കഴിഞ്ഞു എന്നാണ് റിപ്പോർട്ടുകൾ ചൂണ്ടിക്കാണിക്കുന്നത്. പക്ഷേ ഇക്കാര്യത്തിൽ ഒഫീഷ്യൽ സ്ഥിരീകരണങ്ങൾ ഒന്നും വന്നിട്ടില്ല.അൽ ശബാബിലേക്ക് പോവാൻ അൽമിറോൺ സമ്മതം അറിയിച്ചു എന്നുള്ള കാര്യവും റിപ്പോർട്ട് ചൂണ്ടിക്കാണിക്കുന്നുണ്ട്.

കഴിഞ്ഞ സീസണിൽ 15 ഗോൾ പങ്കാളിത്തങ്ങൾ വഹിക്കാൻ കഴിഞ്ഞിട്ടുള്ള താരമാണ് ഇദ്ദേഹം.എന്നാൽ ഇത്തവണത്തെ പ്രീമിയർ ലീഗിൽ തിളങ്ങാൻ അദ്ദേഹത്തിന് കഴിഞ്ഞിട്ടില്ല. 21 മത്സരങ്ങളിൽ നിന്ന് നാല് ഗോൾ പങ്കാളിത്തങ്ങൾ മാത്രമാണ് അദ്ദേഹം വഹിച്ചിട്ടുള്ളത്. അതേസമയം മറ്റൊരു സൂപ്പർതാരമായ യാനിക്ക് കരാസ്ക്കോയെ കൂടി അൽ ഷബാബ് സ്വന്തമാക്കിയിട്ടുണ്ട്.