സ്റ്റെർലിംഗിനെ ഒഴിവാക്കാൻ സിറ്റി, ലക്ഷ്യമിടുന്നത് രണ്ട് ഇംഗ്ലീഷ് താരങ്ങളെ!

ഈ കഴിഞ്ഞ യൂറോയിൽ ഇംഗ്ലണ്ടിന് വേണ്ടി മികച്ച പ്രകടനം നടത്തിയ താരമാണ് റഹീം സ്റ്റെർലിംഗ്. എന്നാൽ കഴിഞ്ഞ സീസണിൽ മാഞ്ചസ്റ്റർ സിറ്റിക്ക്‌ വേണ്ട രൂപത്തിൽ തിളങ്ങാൻ സ്റ്റെർലിങ്ങിന് സാധിച്ചിരുന്നില്ല.അത്കൊണ്ട് തന്നെ സിറ്റി സ്റ്റെർലിംഗിനെ ഒഴിവാക്കാനുള്ള ഒരുക്കത്തിലാണ്. പ്രമുഖ മാധ്യമമായ ദി അത്ലറ്റിക്കാണ് ഇക്കാര്യം റിപ്പോർട്ട്‌ ചെയ്തിട്ടുള്ളത്.ടീമിന്റെ ഫണ്ട് വർധിപ്പിക്കാൻ വേണ്ടിയാണ് സിറ്റി ഇത്തരത്തിലുള്ള ഒരു ആലോചന നടത്തുന്നത് എന്നാണ് ഇവരുടെ റിപ്പോർട്ടുകൾ ചൂണ്ടികാണിക്കുന്നത്.

നിലവിൽ രണ്ട് ക്ലബുകളാണ് സ്റ്റെർലിങ്ങിന് വേണ്ടി രംഗത്തുള്ളത്. ആഴ്സണലും ടോട്ടൻഹാമുമാണ് താരത്തിൽ താല്പര്യം പ്രകടിപ്പിച്ചിട്ടുള്ളത്.പക്ഷേ സ്റ്റെർലിംഗ് ക്ലബ് വിടാൻ തയ്യാറാവുമോ എന്നുള്ളതാണ് നിലവിൽ സിറ്റി നേരിടുന്ന പ്രധാന പ്രശ്നം. സൂപ്പർ താരങ്ങളായ ഹാരി കെയ്ൻ, ജാക്ക് ഗ്രീലിഷ് എന്നിവരെ ടീമിലെത്തിക്കാനുള്ള ഒരുക്കത്തിലാണ് സിറ്റി. അത്കൊണ്ടാണ് സ്റ്റെർലിംഗിനെ ഒഴിവാക്കാൻ ഉദ്ദേശിക്കുന്നത്. കൂടാതെ ബ്രസീലിയൻ താരം ഗബ്രിയേൽ ജീസസിനെയും സിറ്റി ഒഴിവാക്കിയേക്കും. സെർജിയോ അഗ്വേറോ ഈ ട്രാൻസ്ഫറിൽ ക്ലബ് വിടുകയും ചെയ്തിരുന്നു.