സലായും ഹക്കീമിയുമാണ് ഈ ക്ലബ്ബിലേക്ക് ചേക്കേറാൻ പറഞ്ഞത് : പിഎസ്ജി വിട്ട സൂപ്പർ താരം പറയുന്നു!

കഴിഞ്ഞ സമ്മർ ട്രാൻസ്ഫർ ജാലകത്തിലായിരുന്നു സൂപ്പർതാരമായ വൈനാൾഡം ലിവർപൂൾ വിട്ടുകൊണ്ട് പിഎസ്ജിയിൽ എത്തിയത്. എന്നാൽ താരം ക്ലബ്ബിൽ ഹാപ്പിയായിരുന്നില്ല. തനിക്ക് വേണ്ടത്ര അവസരങ്ങൾ ലഭിക്കാത്തതിൽ താരം ക്ലബ്ബിനോടുള്ള അനിഷ്ടം കഴിഞ്ഞ ഒക്ടോബർ മാസത്തിൽ തന്നെ പ്രകടിപ്പിച്ചിരുന്നു.

ഇപ്പോൾ വൈനാൾഡം ഇറ്റാലിയൻ ക്ലബ്ബായ റോമയിലേക്ക് ചേക്കേറിയിട്ടുണ്ട്. ലോൺ അടിസ്ഥാനത്തിലാണ് താരം മൊറിഞ്ഞോക്ക് കീഴിൽ കളിക്കുക. ഇപ്പോൾ തന്നെ റോമയിലേക്ക് എത്താൻ സഹായിച്ച രണ്ട് പേരെ വൈനാൾഡം വെളിപ്പെടുത്തിയിട്ടുണ്ട്. ലിവർപൂളിൽ സഹതാരമായിരുന്ന സലാ,പിഎസ്ജി സഹതാരമായിരുന്ന ഹക്കീമി എന്നിവരാണ് തന്നെ കൺവിൻസ് ആവാൻ സഹായിച്ചത് എന്നാണ് വൈനാൾഡം പറഞ്ഞിട്ടുള്ളത്. താരത്തിന്റെ വാക്കുകളെ ഗോൾ റിപ്പോർട്ട് ചെയ്യുന്നത് ഇങ്ങനെയാണ്.

” ഞാൻ ഇവിടേക്ക് വരാൻ ആഗ്രഹിച്ചിരുന്നു. കാരണം എന്നെ എത്തിക്കാൻ വേണ്ടി അത്രയധികം അവർ എഫർട് എടുത്തിട്ടുണ്ട്.ഞാൻ സലായുമായും സ്ട്രൂട്ട്മാനുമായും സംസാരിച്ചിരുന്നു. ഈ ക്ലബ്ബിനെ കുറിച്ച് നല്ലത് മാത്രമാണ് ഞാൻ കേട്ടിട്ടുള്ളത്. കൂടാതെ ഞാൻ ഹക്കീമിയുമായും സംസാരിച്ചിരുന്നു. അദ്ദേഹം ഇന്ററിന് വേണ്ടിയാണ് കളിച്ചതെങ്കിലും റോമാ മനോഹരമായ ക്ലബ്ബാണ് എന്നുള്ളത് അദ്ദേഹം എന്നോട് പറഞ്ഞു. അതൊക്കെയാണ് എന്നെ ഏറെ കൺവിൻസ് ചെയ്യിച്ചിട്ടുള്ളത്. മനോഹരമായ ഒരുപാട് ആരാധകരുള്ള ക്ലബ്ബ് കൂടിയാണ് റോമ ” വൈനാൾഡം പറഞ്ഞു.

ഈ ട്രാൻസ്ഫർ ജാലകത്തിൽ തന്നെയായിരുന്നു സൂപ്പർ താരം ഡിബാലയെ എത്തിക്കാൻ റോമക്ക് കഴിഞ്ഞത്.മൊറിഞ്ഞോക്ക് കീഴിൽ ഈ സീസണിൽ കൂടുതൽ മികച്ച പ്രകടനം നടത്താൻ റോമക്ക് കഴിയുമെന്നാണ് ആരാധകർ പ്രതീക്ഷിക്കുന്നത്.