മെസ്സിയെയും എംബപ്പേയേയും കിട്ടിയില്ല,അൽ ഹിലാലിന് ഇനി വേണ്ടത് ഒസിംഹനെ!

സൗദി അറേബ്യൻ വമ്പൻമാരായ അൽ ഹിലാൽ ഒരു മേജർ സൈനിങ്ങ് നടത്താനുള്ള ശ്രമങ്ങൾ ആരംഭിച്ചിട്ട് നാളുകൾ ഏറെയായി. ലയണൽ മെസ്സിക്ക് വേണ്ടിയായിരുന്നു അവർ ആദ്യം പരിശ്രമിച്ചിരുന്നത്.എന്നാൽ മെസ്സി ഈ ക്ലബ്ബിനെ നിരസിക്കുകയായിരുന്നു. ഏറ്റവും ഒടുവിൽ അവർ കിലിയൻ എംബപ്പേക്ക് ഞെട്ടിക്കുന്ന ഒരു ഓഫർ നൽകിയിരുന്നു. എന്നാൽ എംബപ്പേയും അത് തള്ളിക്കളയുകയായിരുന്നു.

യൂറോപ്പിൽ നിന്നും ഒരു സൂപ്പർ താരത്തെ എത്തിക്കൽ അൽ ഹിലാലിന് ഇപ്പോൾ അത്യാവശ്യമാണ്.എംബപ്പേയേ ലഭിക്കാതെ വന്നതോടെ അൽ ഹിലാൽ തങ്ങളുടെ ശ്രദ്ധ നാപ്പോളിയുടെ നൈജീരിയൻ സ്ട്രൈക്കറായ വിക്ടർ ഒസിംഹനിൽ പതിപ്പിച്ചിട്ടുണ്ട്. അദ്ദേഹത്തെ സ്വന്തമാക്കാനാണ് ഇപ്പോൾ അൽ ഹിലാലിന് താൽപര്യം. പ്രമുഖ ഫ്രഞ്ച് മാധ്യമമായ ലെ എക്കുപ്പാണ് ഇക്കാര്യം റിപ്പോർട്ട് ചെയ്തിരിക്കുന്നത്.

കഴിഞ്ഞ സീസണിൽ നാപ്പോളിക്ക് വേണ്ടി തകർപ്പൻ പ്രകടനം നടത്തി കിരീടം നേടിക്കൊടുക്കുന്നതിൽ നിർണായക പങ്കുവഹിച്ചിട്ടുള്ള താരമാണ് വിക്ടർ ഒസിംഹൻ. 32 ലീഗ് മത്സരങ്ങളിൽ നിന്ന് 26 ഗോളുകളും നാല് അസിസ്റ്റുകളും അദ്ദേഹം നേടിയിരുന്നു.ഈ താരത്തെ സ്വന്തമാക്കാൻ വേണ്ടി മാഞ്ചസ്റ്റർ യുണൈറ്റഡും പിഎസ്ജിയും ശ്രമിച്ചിരുന്നു. എന്നാൽ വിട്ടു നൽകാൻ നാപോളി തയ്യാറായിരുന്നില്ല.വലിയ തുകയായിരുന്നു അവർ ആവശ്യപ്പെട്ടിരുന്നത്.

നിലവിൽ മാഞ്ചസ്റ്റർ യുണൈറ്റഡ് താരത്തിന് വേണ്ടി സജീവമായി രംഗത്തില്ല. അതുകൊണ്ടുതന്നെ അൽഹിലാലിൽ നിന്നും പിഎസ്ജിക്കാണ് വെല്ലുവിളി നേരിടേണ്ടി വരിക. എന്നാൽ ഒസിംഹൻ യൂറോപ്പ് വിടാൻ തയ്യാറാകുമോ എന്നുള്ളതും വലിയൊരു ചോദ്യചിഹ്നമാണ്. താരത്തെ സ്വന്തമാക്കാൻ പണം ഒരിക്കലും അൽഹിലാലിന് തടസ്സമാവില്ല.