പോഗ്ബയെ യുണൈറ്റഡ് വിട്ടു നൽകും, പകരം റയലിനോട് ആവിശ്യപ്പെടുക ആ താരത്തെ !

മാഞ്ചസ്റ്റർ യുണൈറ്റഡിന്റെ മധ്യനിര താരം പോൾ പോഗ്ബക്ക് റയൽ മാഡ്രിഡിലേക്ക് ചേക്കേറാൻ താല്പര്യമുണ്ടെന്ന് ഈയിടെ വ്യക്തമാക്കിയിരുന്നു. തന്റെ സ്വപ്നമാണ് ആ ക്ലബ് എന്നാണ് പോഗ്ബ ഒരു അഭിമുഖത്തിൽ തുറന്നു പറഞ്ഞത്. ഇതിനെ തുടർന്ന് പല ഭാഗത്ത് നിന്നും താരത്തിന് വിമർശനം കേൾക്കേണ്ടി വന്നിരുന്നു. ഇപ്പോഴിതാ താരത്തെ റയലിന് വിട്ടു നൽകാൻ യുണൈറ്റഡിന് സമ്മതമാണ്. പകരം റയൽ മാഡ്രിഡിന്റെ മധ്യനിര താരം ഫെഡെ വാൽവെർദെയെയാണ് യുണൈറ്റഡിന് ആവിശ്യം. ഇംഗ്ലീഷ് മാധ്യമമായ ദി സൺ ആണ് ഇത് റിപ്പോർട്ട്‌ ചെയ്തിരിക്കുന്നത്. പോഗ്ബയെ എത്തിക്കാൻ റയൽ പരിശീലകൻ സിദാന് മുമ്പേ താല്പര്യമുണ്ട്. പക്ഷെ ഈയിടെ റയൽ ആ ശ്രമം ഉപേക്ഷിച്ചുവെന്നും പകരം ഫ്രഞ്ച് യുവവിസ്മയം കാമവിങ്കയെ റാഞ്ചാനാണ് റയലിന്റെ പദ്ധതിയെന്നും വാർത്തകൾ ഉണ്ടായിരുന്നു.

ഇരുപത്തിരണ്ടുകാരനായ വാൽവെർദെ കഴിഞ്ഞ സീസണിൽ മികച്ച പ്രകടനം നടത്തിയിരുന്നു. എന്നാൽ ഈ സീസണിൽ വേണ്ട അവസരങ്ങൾ താരത്തിന് ലഭിച്ചിട്ടില്ല. നിലവിൽ താരത്തിന് 2025 വരെ റയലിൽ കരാറുണ്ട്. മാത്രമല്ല 500 മില്യൺ യൂറോയാണ് താരത്തിന്റെ റിലീസ് ക്ലോസ്. താരത്തെ വിൽക്കാനുള്ള ഒരു ഉദ്ദേശവും റയൽ മാഡ്രിഡ്‌ ഇതുവരെ കാണിച്ചിട്ടില്ല. പക്ഷെ പോഗ്ബയെ ഓഫർ ചെയ്ത സ്ഥിതിക്ക് താരത്തെ വിട്ടുനൽകുമോ എന്ന് നോക്കികാണേണ്ടതുണ്ട്.2022 വരെയാണ് പോഗ്ബക്ക് യുണൈറ്റഡിൽ കരാറുള്ളത്. സിദാന് താല്പര്യമുള്ള താരമായത് കൊണ്ട് യുണൈറ്റഡിന്റെ ഓഫർ റയൽ സ്വീകരിക്കാൻ സാധ്യതയുണ്ട്. പക്ഷെ പോഗ്ബയെ എത്തിക്കുന്നതിന് പകരം യുവതാരങ്ങളെ എത്തിക്കുന്നതാണ് നല്ലത് എന്നാണ് ഭൂരിഭാഗം ആരാധകരുടെയും അഭിപ്രായം.