പപ്പു ഗോമസ് ലാലിഗയിലേക്ക്? ഓഫറുമായി വമ്പൻമാർ!

അർജന്റൈൻ താരം പപ്പു ഗോമസിന്റെ ഭാവി ഇപ്പോഴും തീരുമാനമായിട്ടില്ല. അറ്റലാന്റ പരിശീലകൻ ഗാസ്പിറിനിയുമായി ഉടക്കിലായ ശേഷം താരം കുറച്ചു കാലം ടീമിന് പുറത്തായിരുന്നു. അതിന് ശേഷം ടീമിൽ മഞ്ഞുരുക്കം ആരംഭിച്ചതായി വാർത്തകൾ ഉണ്ടായിരുന്നു. പക്ഷെ താരം ക്ലബ് വിടുമോ അതോ ക്ലബ്ബിൽ തന്നെ തുടരുമോ എന്നുള്ളത് ഇപ്പോഴും തീരുമാനമാവാത്ത കാര്യമാണ്. ഇപ്പോഴിതാ താരത്തെ തങ്ങളുടെ കൂടാരത്തിലെത്തിക്കാനുള്ള ഒരുക്കത്തിലാണ് സ്പാനിഷ് വമ്പൻമാരായ സെവിയ്യ. ഇവർ ഓഫറുമായി താരത്തെ സമീപിച്ചതായാണ് വാർത്തകൾ.സ്കൈ സ്‌പോർട് ഇറ്റാലിയ, കാൽസിയോ മെർകാറ്റോ എന്നീ ഇറ്റാലിയൻ മാധ്യമങ്ങളാണ് ഇക്കാര്യം റിപ്പോർട്ട്‌ ചെയ്തിരിക്കുന്നത്.

പത്ത് മില്യൺ യൂറോയാണ് ഈ അർജന്റൈൻ താരം സാലറിയായി ആവിശ്യപ്പെടുന്നത്. ഇതായിരുന്നു പല ചെറുകിട ക്ലബുകൾക്കും തടസ്സം. അതേസമയം സിരി എയിലെ തന്നെ വമ്പൻമാരായ എസി മിലാൻ, ഇന്റർമിലാൻ, റോമ എന്നിവർ ഗോമസിന് വേണ്ടി രംഗത്തുണ്ടായിരുന്നു. എന്നാൽ തങ്ങളുടെ എതിരാളികൾ തന്നെയായ ഇവർക്ക്‌ സൂപ്പർ താരത്തെ നൽകാൻ അറ്റലാന്റ വിസമ്മതം പ്രകടിപ്പിക്കുകയായിരുന്നു. ഇതോടെയാണ് സെവിയ്യ താരത്തിന് വേണ്ടി രംഗത്ത്‌ വന്നത്. എന്നാൽ ശേഷിക്കുന്ന കരിയർ ഇറ്റലിയിൽ തന്നെ പൂർത്തിയാക്കുന്നതിനാണ് പപ്പു ഗോമസ് മുൻഗണന നൽകുന്നത്. ഏതായാലും താരം സെവിയ്യയുടെ ഓഫർ സ്വീകരിക്കുമോ എന്ന് കാത്തിരുന്നു കാണേണ്ടിയിരിക്കുന്നു.