ആന്റണിക്ക് യുണൈറ്റഡിലേക്ക് പോവണം,യുണൈറ്റഡ് നൽകിയത് ഭീമൻ ഓഫർ,പക്ഷേ..!

ഈ സമ്മർ ട്രാൻസ്ഫർ വിൻഡോ അടക്കാൻ ഇനി വിരലിൽ എണ്ണാവുന്ന ദിവസങ്ങൾ മാത്രമാണ് അവശേഷിക്കുന്നത്. പ്രീമിയർ ലീഗ് വമ്പൻമാരായ മാഞ്ചസ്റ്റർ യുണൈറ്റഡ് ഏറ്റവും വലിയ ലക്ഷ്യമായ ആന്റണിക്ക് വേണ്ടിയുള്ള ശ്രമങ്ങൾ അവർ തകൃതിയായി നടക്കുന്നുണ്ട്. എന്നാൽ താരത്തിന്റെ ക്ലബ്ബായ അയാക്സ് ഇതുവരെ വഴങ്ങിയിട്ടില്ല എന്നാണ് റിപ്പോർട്ടുകൾ സൂചിപ്പിക്കുന്നത്.

അതായത് മാഞ്ചസ്റ്റർ യുണൈറ്റഡിലേക്ക് ചേക്കേറാൻ ആന്റണി ആഗ്രഹിക്കുന്നുണ്ട്.ഇക്കാര്യം അദ്ദേഹം തന്റെ ക്ലബ്ബിനോട് തുറന്നുപറയുകയും ചെയ്തിട്ടുണ്ട്. മാത്രമല്ല മാഞ്ചസ്റ്റർ യുണൈറ്റഡ് ആന്റണിക്ക് വേണ്ടി കഴിഞ്ഞ ദിവസം ഒരു ഭീമൻ ഓഫർ അയാക്സിന് മുന്നിൽ വെച്ചിരുന്നു. താരത്തിന് വേണ്ടി 90 മില്യൺ യൂറോയുടെ ബിഡായിരുന്നു യുണൈറ്റഡ് സമർപ്പിച്ചിരുന്നത്.

ഒരു അയാക്സ് താരത്തിന് ലഭിക്കുന്ന ഏറ്റവും വലിയ ഓഫറാണിത്. എന്നാൽ അയാക്സ് ഇതും നിരസിച്ചു കഴിഞ്ഞിട്ടുണ്ട് എന്നാണ് അറിയാൻ സാധിക്കുന്നത്. പ്രമുഖ ഫുട്ബോൾ ജേണലിസ്റ്റായ ഫാബ്രിസിയോ റൊമാനോയാണ് ഇക്കാര്യം റിപ്പോർട്ട് ചെയ്തിട്ടുള്ളത്.

ഇതോടെ ആന്റണി വലിയ നിരാശയിലാണ്.അയാക്സിനെ സംബന്ധിച്ചിടത്തോളം ആന്റണിക്കൊരു പകരക്കാരൻ ഇല്ലാത്തതാണ് താരത്തെ പിടിച്ചുനിർത്താൻ അവരെ പ്രേരിപ്പിക്കുന്നത്. മാത്രമല്ല ഇപ്പോൾ തന്നെ ഒരുപാട് സൂപ്പർതാരങ്ങളെ നഷ്ടമായതിനാൽ ആന്റണിയെ വിൽക്കരുതെന്ന് അയാക്സ് പരിശീലകൻ ക്ലബ്ബിനോട് അഭ്യർത്ഥിക്കുകയും ചെയ്തിരുന്നു. ഏതായാലും മാഞ്ചസ്റ്റർ യുണൈറ്റഡ് ശ്രമങ്ങൾ ഉപേക്ഷിക്കാൻ തയ്യാറാവില്ല. കൂടുതൽ വലിയ ഒരു ബിഡ് സമർപ്പിക്കാനുള്ള ഒരുക്കത്തിലാണ് നിലവിൽ മാഞ്ചസ്റ്റർ യുണൈറ്റഡുള്ളത്.