രാജാവ് സിംഹാസനത്തിലെത്തും, കോമാളി സർക്കസിലും: ഡിബാലക്കെതിരെ തിരിഞ്ഞ് യുവെന്റസ് ആരാധകർ!

യുവന്റസിന്റെ അർജന്റൈൻ സൂപ്പർ താരമായ പൗലോ ഡിബാല ക്ലബ് വിടുകയാണ് എന്നുള്ളത് ഉറപ്പായിരുന്നു. ക്ലബ്ബുമായി പുതിയ കരാറിൽ എത്താൻ താരത്തിന് സാധിച്ചിരുന്നില്ല. അതുകൊണ്ടുതന്നെ യുവന്റസ് തങ്ങളുടെ അവസാന മത്സരത്തിൽ ഡിബാലക്ക് യാത്രയപ്പ് നൽകുകയും ചെയ്തിരുന്നു. പൊട്ടിക്കരഞ്ഞുകൊണ്ടായിരുന്നു ഡിബാല യുവന്റസിനോട് വിടചൊല്ലിയത്.

എന്നാൽ നിലവിൽ ഡിബാല ചേക്കേറാൻ ഏറ്റവും കൂടുതൽ സാധ്യതയുള്ള ക്ലബ്ബ് സിരി എയിലെ തന്നെ വമ്പന്മാരായ ഇന്റർ മിലാനാണ്. യുവന്റസിന്റെ ബദ്ധവൈരികളായ ഇന്ററിലേക്ക് താരം ചേക്കേറുന്നത് യുവന്റസ് ആരാധകർ ഒട്ടും ഹാപ്പിയല്ല. മാത്രമല്ല സാമൂഹിക മാധ്യമങ്ങളിൽ താരത്തിനെതിരെ യുവന്റസ് ആരാധകർ വലിയ പ്രതിഷേധമാണ് നടത്തുന്നത്. ഏതായാലും ആരാധകരുടെ അത്തരത്തിലുള്ള ചില പോസ്റ്റുകൾ നമുക്കൊന്ന് പരിശോധിക്കാം.

” സമയം എല്ലാവരെയും അവരുടെ സ്ഥലത്ത് കൊണ്ടെത്തിക്കും. രാജാവ് അവന്റെ സിംഹാസനത്തിൽ എത്തും, കോമാളി അവന്റെ സർകസ്സിലും എത്തും ” ഇതാണ് ഒരു ആരാധകൻ പോസ്റ്റ് ചെയ്തിരിക്കുന്നത്. ഈ ട്വീറ്റിനൊപ്പം അദ്ദേഹം ക്രിസ്ത്യാനോ റൊണാൾഡോയുടെയും ഡിബാലയുടെയും ഈ ചിത്രം പങ്കു വെച്ചിട്ടുണ്ട്.

മറ്റൊരു ആരാധകന്റെ ട്വീറ്റ് ഇങ്ങനെയാണ്.

” ആദ്യം നിങ്ങൾ യുവന്റസിന് വേണ്ടി കണ്ണീരൊഴുക്കി, പിന്നീട് നിങ്ങളവരുടെ ശത്രുക്കളുടെ ഒപ്പം ചേരാൻ പോകുന്നു. നിങ്ങളൊരു ചതിയനാണ് ” ഇതാണ് അദ്ദേഹം ട്വീറ്റ് ചെയ്തിരിക്കുന്നത്.

മറ്റൊരു വ്യക്തി കുറിച്ചിരിക്കുന്നത് ഇങ്ങനെയാണ്.

” ഡിബാലയുടെ കണ്ണീരിൽ വിശ്വസിക്കാത്തവർ കൈകൾ ഉയർത്തൂ ” ഇതാണ് അദ്ദേഹത്തിന്റെ ട്വീറ്റ്.

” നിങ്ങളെ ഞാൻ ഇഷ്ടപ്പെടുന്നുണ്ട്. പക്ഷേ ഇത്തരം പ്രവർത്തികളിലൂടെ നിങ്ങൾ മറ്റുള്ളവരെക്കാൾ മോശം വ്യക്തിയാണ് എന്നാണ് തെളിയിച്ചു കൊണ്ടിരിക്കുന്നത്. സ്വന്തം വാക്കിനെ വിലകൽപ്പിക്കാത്ത ഒരാളാണ് നിങ്ങൾ ” ഇതാണ് ഒരു വ്യക്തി ട്വീറ്റ് ചെയ്തിരിക്കുന്നത്.

ഏതായാലും ഡിബാലയുടെ കാര്യത്തിൽ ഇതുവരെ ഔദ്യോഗിക സ്ഥിരീകരണങ്ങൾ ഒന്നും വന്നിട്ടില്ല. ഇന്ററിനെ കൂടാതെ പല ക്ലബ്ബുകൾക്കും അദ്ദേഹത്തിൽ താല്പര്യമുണ്ട്.