മറ്റൊരു താരത്തിനും കൂടി കൊറോണ സ്ഥിരീകരിച്ച് യുവന്റസ്

തങ്ങളുടെ രണ്ടാമത്തെ താരത്തിനും കൊറോണ സ്ഥിരീകരിച്ച് യുവന്റസ്. ക്ലബ്‌ ഇന്നലെ പുറപ്പെടുവിച്ച പ്രസ്താവനയിലാണ് താരമായ ബ്ലൈസ് മറ്റിയൂഡിക്ക് കൊറോണ പരിശോധനഫലം പോസിറ്റീവ് ആയ കാര്യം അറിയിച്ചത്. മുൻപ് ഡിഫൻഡർ ഡാനിയേലെ റുഗാനിക്ക് കൊറോണ സ്ഥിരീകരിച്ചിരുന്നു. ഇതോടെ സിരി എയിൽ കൊറോണ ബാധിതരുടെ എണ്ണം വർധിക്കുകയാണ്. മുൻപ് സാംപടോറിയയുടെയും ഫിയോറെന്റീനയുടെയും താരങ്ങൾക്ക് കൊറോണ സ്ഥിരീകരിച്ചിരുന്നു.

” ബ്ലൈസ് മറ്റിയൂഡിയുടെ കോവിഡ് 19 പരിശോധനഫലം പോസിറ്റീവ് ആണെന്ന് തെളിഞ്ഞിരിക്കുന്നു. താരം മാർച്ച്‌ പതിനൊന്ന് മുതൽ വീട്ടിൽ സ്വയം ഐസോലേഷനിൽ ആണ്. താരത്തിന് കുഴപ്പമൊന്നുമില്ല ” ഇതായിരുന്നു യുവന്റസ് പുറത്തിറക്കിയ പ്രസ്താവനയിൽ കുറിച്ചിരുന്നത്. മാർച്ച്‌ പതിനൊന്നിനായിരുന്നു യുവന്റസ് താരമായ റുഗാനിക്ക് കൊറോണ സ്ഥിരീകരിച്ചിരുന്നത്. ഇതോടെ ക്ലബ്‌ തങ്ങളുടെ 121 അംഗങ്ങളേയും വളന്ററി ഐസോലേഷനിലേക്ക് അയച്ചിരുന്നു. ക്ലബിന്റെ പ്രസിഡന്റ്‌ ആൻഡ്രിയ ആഗ്നെല്ലി അടക്കം എല്ലാവരും നിലവിൽ സ്വയം ഐസോലേഷനിൽ ആണ്.