പരിശീലനം നടത്തിയില്ല,സഹതാരങ്ങളോട് വിടചൊല്ലി ക്രിസ്റ്റ്യാനോ!

സൂപ്പർ താരം ക്രിസ്റ്റ്യാനോ റൊണാൾഡോ യുവന്റസ് വിടുന്നു എന്നുള്ള കാര്യം ഏകദേശം ഉറപ്പാവുകയാണ്. ഇതുമായി ബന്ധപ്പെട്ട പുതിയ തെളിവുകളാണ് ഇപ്പോൾ ഫുട്ബോൾ ലോകത്ത് നിന്നും പുറത്തേക്ക് വന്നു കൊണ്ടിരിക്കുന്നത്. യുവന്റസിലെ തന്റെ സഹതാരങ്ങളോട് ക്രിസ്റ്റ്യാനോ വിടചൊല്ലിയതായാണ് അറിയാൻ കഴിയുന്നത്.പ്രമുഖ ഫുട്ബോൾ ജേണലിസ്റ്റായ ഫാബ്രിസിയോ റൊമാനോ ഇക്കാര്യം അറിയിച്ചിട്ടുണ്ട്. കൂടാതെ ക്രിസ്റ്റ്യാനോ റൊണാൾഡോ യുവന്റസിന്റെ ട്രെയിനിങ് കോപ്ലക്സിൽ നിന്നും പുറത്ത് പോവുന്ന വീഡിയോ പ്രമുഖ മാധ്യമമായ ഗോൾ ഡോട്ട് കോം പങ്കുവെച്ചിട്ടുണ്ട്.

യുവന്റസിന്റെ പരിശീലനസ്ഥലത്തെത്തിയ റൊണാൾഡോ അവിടെ നാല്പത് മിനുട്ട് മാത്രമാണ് ചിലവഴിച്ചത്. തന്റെ സഹതാരങ്ങളോട് ഗുഡ് ബൈ പറയാനാണ് റൊണാൾഡോ ഈ സമയം ഉപയോഗപ്പെടുത്തിയത്. തുടർന്ന് താരം പരിശീലനത്തിൽ പങ്കെടുക്കാതെ പുറത്ത് പോവുകയായിരുന്നു. ഇതോടെ റൊണാൾഡോയുടെ ഉദ്ദേശം യുവന്റസ് വിടുക തന്നെയാണ് എന്നുള്ളത് കൂടുതൽ വ്യക്തമായി കഴിഞ്ഞു.നിലവിൽ മാഞ്ചസ്റ്റർ സിറ്റിയുടെ ഔദ്യോഗിക ഓഫറിന് വേണ്ടിയുള്ള കാത്തിരിപ്പിലാണ് താരം.