നാപോളിയുടെ അപ്പീൽ ഫലം കണ്ടു, യുവന്റസിന്റെ പോയിന്റ് കുറച്ചു !

ഒടുവിൽ നാപോളിയുടെ അപ്പീൽ ഫലം കണ്ടു. യുവന്റസിന് ലഭിച്ച പോയിന്റ് കുറക്കാനും മത്സരം വീണ്ടും നടത്താനും ധാരണയായി. ഇന്നലെയാണ് ഇറ്റാലിയൻ ഒളിമ്പിക് കമ്മറ്റി സ്പോർട്സ് ഗ്യാരന്റി ബോർഡ് നാപോളിയുടെ അപ്പീലിനെ പരിഗണിച്ചത്. കഴിഞ്ഞ ഒക്ടോബർ നാലിനായിരുന്നു യുവന്റസ്-നാപോളി മത്സരം നടക്കേണ്ടിയിരുന്നത്. എന്നാൽ ട്യൂറിനിൽ വെച്ച് നടക്കേണ്ട മത്സരം നടന്നിരുന്നില്ല. നാപോളിയിലെ രണ്ട് അംഗങ്ങൾക്ക് കോവിഡ് സ്ഥിരീകരിച്ചതോടെ ടുറിനിലേക്ക് എത്തിചേരാൻ കഴിയാതെ വരികയായിരുന്നു. ഇറ്റലിയിലെ ലോക്കൽ ഹെൽത്ത് അതോറിറ്റിയുടെ നിർദേശപ്രകാരമായിരുന്നു തങ്ങൾക്ക്‌ എത്തിച്ചേരാൻ സാധിക്കാത്തത് എന്നായിരുന്നു നാപോളിയുടെ വാദം.

എന്നാൽ സിരി എയും എഫ്ഐജിസിയും ഇത് തള്ളികളയുകയായിരുന്നു. മത്സരത്തിന് വേണ്ടി എത്തിച്ചേരാൻ പോലും നാപോളി ശ്രമിച്ചില്ല എന്ന് കണ്ടെത്തിയ അധികൃതർ മത്സരത്തിൽ നപ്പോളി തോറ്റതായി പ്രഖ്യാപിക്കുകയായിരുന്നു. 3-0 എന്ന സ്കോറിന് യുവന്റസിനോട് തോറ്റതായി കണക്കാക്കുകയും മൂന്ന് പോയിന്റുകൾ യുവന്റസിന് ലഭിക്കുകയായിരുന്നു. ഈ നടപടിക്കെതിരെ നാപോളി രണ്ട് തവണ അപ്പീൽ പോയിരുന്നുവെങ്കിലും ഫലം കണ്ടിരുന്നില്ല. എന്നാൽ ഇപ്രാവശ്യം ഫലം കാണുകയായിരുന്നു. ഫലമായി യുവന്റസിന്റെ പോയിന്റുകൾ കുറക്കുകയും മത്സരം നടത്താൻ തീരുമാനിക്കുകയുമായിരുന്നു.