ഡി മരിയക്ക് പിന്നാലെ മറ്റൊരു അർജന്റൈൻ സൂപ്പർ താരത്തെ കൂടി റാഞ്ചാൻ യുവന്റസ്!

ഈ കഴിഞ്ഞ സീസണോട് കൂടിയായിരുന്നു പിഎസ്ജിയുടെ അർജന്റൈൻ സൂപ്പർ താരമായ ഡി മരിയയുടെ ക്ലബ്ബുമായുള്ള കരാർ അവസാനിച്ചത്.തുടർന്ന് താരത്തെ സ്വന്തമാക്കാൻ ഇറ്റാലിയൻ വമ്പൻമാരായ യുവന്റസിന് സാധിച്ചിരുന്നു. കൂടാതെ മാഞ്ചസ്റ്റർ യുണൈറ്റഡിന്റെ സൂപ്പർ താരമായ പോൾ പോഗ്ബയെയും ഫ്രീ ഏജന്റായി കൊണ്ട് യുവന്റസ് റാഞ്ചിയിരുന്നു.

ഇനി യുവന്റസിന്റെ ലക്ഷ്യം മറ്റൊരു അർജന്റൈൻ താരമാണ്.പിഎസ്ജിയുടെ മധ്യനിരതാരമായ ലിയാൻഡ്രോ പരേഡസിൽ യുവന്റസിന് താല്പര്യമുണ്ട്. ഇറ്റാലിയൻ മാധ്യമമായ ട്യൂട്ടോസ്പോർട്ടാണ് ഇക്കാര്യം റിപ്പോർട്ട് ചെയ്തിരിക്കുന്നത്.

പിഎസ്ജിയുടെ പുതിയ പരിശീലകനായ ക്രിസ്റ്റോഫ് ഗാൾട്ടിയർ ക്ലബ്ബിനകത്ത് വലിയ ഒരു അഴിച്ചു പണിക്കുള്ള ഒരുക്കത്തിലാണ്.ഇതിന്റെ ഫലമായിക്കൊണ്ട് 11 പിഎസ്ജി താരങ്ങൾക്ക് സ്ഥാനം നഷ്ടമാകുമെന്ന് ഫ്രഞ്ച് മാധ്യമങ്ങൾ റിപ്പോർട്ട് ചെയ്തിരുന്നു.ഇക്കൂട്ടത്തിൽ ലിയാൻഡ്രോ പരേഡസിനെയും ഒഴിവാക്കാൻ പിഎസ്ജി ഉദ്ദേശിക്കുന്നുണ്ട്. താരത്തിന് അനുയോജ്യമായ ഓഫർ വന്നു കഴിഞ്ഞാൽ പിഎസ്ജി താരത്തെ കൈവിട്ടേക്കും.

പക്ഷേ യുവന്റസിനും നിലവിൽ കാര്യങ്ങൾ എളുപ്പമല്ല. എന്തെന്നാൽ മധ്യനിര താരങ്ങളായ ആരോൺ റാംസി,ആർതർ എന്നിവരെ ആദ്യം യുവന്റസിന് ഒഴിവാക്കേണ്ടതുണ്ട്. അങ്ങനെ നടന്നാൽ മാത്രമേ പരേഡസിനെ ടീമിലേക്കെത്തിക്കാൻ യുവന്റസിന് സാധിക്കുകയുള്ളൂ.

നിലവിൽ പിഎസ്ജിക്കൊപ്പം തന്നെയാണ് പരേഡസുള്ളത്. മറ്റൊരു അർജന്റൈൻ താരമായ മൗറോ ഇക്കാർഡിയെയും ഒഴിവാക്കാൻ പിഎസ്ജി തീരുമാനിച്ചിട്ടുണ്ട്.പക്ഷേ ഈ താരങ്ങൾക്കൊക്കെ അനുയോജ്യമായ ക്ലബ്ബ് കണ്ടെത്തുക എന്നുള്ളതാണ് പിഎസ്ജിയുടെ മുന്നിലുള്ള വെല്ലുവിളി.