ഡിബാലയോട് അസൂയയാണോ? റോമക്ക് രണ്ട് രാജാക്കന്മാർ ഉണ്ടാവുമെന്ന് ടാമ്മി എബ്രഹാം!

ഈ ട്രാൻസ്ഫർ ജാലകത്തിലായിരുന്നു സൂപ്പർതാരം പൗലോ ഡിബാല യുവന്റസ് വിട്ടുകൊണ്ട് റോമയിൽ എത്തിയത്. രാജകീയ വരവേൽപ്പാണ് താരത്തിന് റോമാ ആരാധകർ നൽകിയിരുന്നത്.യുവന്റസിലെ മികവ് താരത്തിന് റോമയിലും തുടരാൻ കഴിയുമെന്നാണ് ആരാധകർ പ്രതീക്ഷിക്കുന്നത്.

അതേസമയം ഇതുവരെ റോമയുടെ മുന്നേറ്റങ്ങൾക്ക് നേതൃത്വം നൽകിയിരുന്നത് സൂപ്പർ താരം ടാമി എബ്രഹാമായിരുന്നു. അതുകൊണ്ടുതന്നെ കഴിഞ്ഞ അഭിമുഖത്തിൽ ടാമിയോട് ഒരു ചോദ്യം ചോദിക്കപ്പെട്ടിരുന്നു.പൗലോ ഡിബാല വന്നതുകൊണ്ട് അസൂയയുണ്ടോ എന്നായിരുന്നു ചോദ്യം. എന്നാൽ അങ്ങനെയൊന്നും ഇല്ലെന്നും റോമക്ക് രണ്ട് രാജാക്കന്മാർ ഉണ്ടാവുമെന്നുമാണ് ടാമി പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ കൊറയ്റ ഡെല്ലോ സ്പോർട് റിപ്പോർട്ട് ചെയ്യുന്നത് ഇങ്ങനെയാണ്.

“എനിക്ക് അദ്ദേഹത്തോട് അസൂയയൊന്നുമില്ല. മറിച്ച് ഇവിടെ രണ്ട് രാജാക്കന്മാർ ഉണ്ടാവും.ഈ ലെവലിൽ ഉള്ള ഒരു താരം ടീമിൽ ഉണ്ടാവുക എന്നുള്ളത് ഒരു പ്രിവിലേജ് തന്നെയാണ്. ആരാധകരെ സംബന്ധിച്ചിടത്തോളവും ഞങ്ങളെ സംബന്ധിച്ചിടത്തോളവും ഇതൊരുപാട് സന്തോഷം നൽകുന്ന കാര്യമാണ്. ഞങ്ങൾ ഇവിടെ കെട്ടിപ്പടുത്തുയർത്തുന്നത് ഒരു ഹൈ പ്രൊഫൈൽ ടെക്നിക്കൽ പ്രൊജക്റ്റ് ആണ് ” ഇതാണ് ടാമ്മി എബ്രഹാം പറഞ്ഞിട്ടുള്ളത്.

കഴിഞ്ഞ സീസണിലായിരുന്നു താരം ചെൽസി വിട്ടുകൊണ്ട് റോമയിൽ എത്തിയത്. 17 ഗോളുകളാണ് അരങ്ങേറ്റ സീസണിൽ തന്നെ താരം നേടിയത്.റോമക്ക് യുവേഫ കോൺഫറൻസ് ലീഗ് നേടി കൊടുക്കുന്നതിലും വലിയ പങ്കുവഹിക്കാൻ ഈ സൂപ്പർതാരത്തിന് സാധിച്ചിട്ടുണ്ട്.