ക്രിസ്റ്റ്യാനോ റൊണാൾഡോയുടെ ക്രിസ്മസ് ആഘോഷം ദുബൈയിൽ !

സൂപ്പർ താരം ക്രിസ്റ്റ്യാനോ റൊണാൾഡോയുടെ ക്രിസ്മസ് ആഘോഷം ദുബൈയിലെന്ന് റിപ്പോർട്ടുകൾ. ഇറ്റാലിയൻ മാധ്യമമായ ലാ ഗസറ്റ ഡെല്ലോ സ്പോർട്ട് ആണ് റൊണാൾഡോ ദുബൈയിലേക്ക് യാത്ര തിരിച്ച വിവരം റിപ്പോർട്ട്‌ ചെയ്തത്. ഫുട്ബോൾ താരങ്ങൾക്ക്‌ ക്വാറന്റയിൻ റൂളുകൾ നിലവിൽ ബാധകമല്ല. അതിനാൽ തന്നെ ഇറ്റലിക്ക്‌ പുറത്ത് ഹോളിഡേ ആഘോഷിക്കാൻ താരങ്ങൾക്ക്‌ അനുമതിയുണ്ട്. ഇതിനാലാണ് റൊണാൾഡോ കുടുംബസമേതം ദുബൈയിലേക്ക് യാത്ര തിരിച്ചത്. റൊണാൾഡോക്ക്‌ പുറമേ നാലോളം യുവന്റസ് താരങ്ങളും ഇറ്റലിക്ക്‌ പുറത്ത് ഹോളിഡേ ആഘോഷിക്കുന്നുണ്ട്. നിലവിൽ ഡിസംബർ 21-നും ജനുവരി ആറിനുമിടയിൽ ഇറ്റലിയിലേക്ക് തിരിച്ചെത്തുന്നവർ നിർബന്ധമായും ഐസൊലേഷനിൽ തുടരണമെന്ന നിയമം നിലവിൽ ഇറ്റലിയിലുണ്ട്.

എന്നാൽ ഫുട്ബോൾ താരങ്ങൾക്ക്‌ ഇതിൽ ഇളവുണ്ട്. ഐസൊലേഷനിൽ ആവുന്ന സമയത്ത് തന്നെ പരിശീലനം നടത്താൻ അനുമതിയുണ്ട്. കൂടാതെ മറ്റുള്ള മെഡിക്കൽ പരിശോധനകൾക്ക് വിധേയരാവാം. ടീം അംഗങ്ങളുമായി ബന്ധം പുലർത്തുകയും പരിശീലനം നടത്തുകയും ചെയ്യാം. അതേസമയം ഒട്ടുമിക്ക താരങ്ങൾക്കും പല വിധേനയുള്ള തടസ്സങ്ങൾ കാരണം കുടുംബത്തോടൊപ്പം ക്രിസ്മസ് ആഘോഷിക്കാൻ സാധിച്ചിട്ടില്ല. ഇനി ജനുവരി നാലിനാണ് യുവന്റസിന് മത്സരമുള്ളത്. കഴിഞ്ഞ മത്സരത്തിൽ ഫിയോറെന്റിനയോട് യുവന്റസ് എതിരില്ലാത്ത മൂന്ന് ഗോളുകൾക്ക്‌ തകർന്നടിഞ്ഞിരുന്നു. ഇനി ഉഡിനസിനോടാണ് യുവന്റസിന്റെ മത്സരം.