കളത്തിൽ ഒന്നും ചെയ്യില്ല,’ആളായി’ നടക്കാൻ മാത്രം കൊള്ളാം : സ്ലാട്ടനെതിരെ പൊട്ടിത്തെറിച്ച് ചൽഹനോളു!

ഈ സീസണിലെ സിരി എ കിരീടം നേടാൻ വമ്പൻമാരായ എസി മിലാന് സാധിച്ചിരുന്നു. ഇതിന്റെ സെലിബ്രേഷനിൽ നിറഞ്ഞുനിന്നിരുന്നത് സൂപ്പർതാരം സ്ലാട്ടൻ ഇബ്രാഹിമോവിച്ചായിരുന്നു.സിഗാർ വലിച്ച്, ഷാംപെയിൻ ചീറ്റി കൊണ്ടുള്ള അദ്ദേഹത്തിന്റെ എൻട്രിയൊക്കെ വലിയ രൂപത്തിൽ സാമൂഹിക മാധ്യമങ്ങളിൽ കയ്യടി നേടിയിരുന്നു.

എന്നാൽ ഈ സെലിബ്രേഷനിടെ ആരാധകർ ചൽഹനോളുവിനെ പരിഹസിക്കുന്ന രൂപത്തിലുള്ള പ്രവർത്തനങ്ങൾ ചെയ്യുകയും ചാന്റുകൾ മുഴക്കുകയും ചെയ്തിരുന്നു. ഈ പ്രവർത്തനങ്ങളിൽ സ്ലാട്ടൻ ഇബ്രാഹിമോവിച്ചും പങ്കാളിയായിരുന്നു.

എന്നാൽ സ്ലാട്ടനെതിരെ ചൽഹനോളു ഇപ്പോൾ രൂക്ഷ വിമർശനങ്ങൾ ഉയർത്തിയിട്ടുണ്ട്. അതായത് കിരീടം നേടാൻ വേണ്ടി കളത്തിൽ ഒന്നും ചെയ്യാതെ ആളുകളുടെ ശ്രദ്ധ പിടിച്ചു പറ്റാൻ മാത്രം ശ്രമിക്കുന്ന ഒരു താരമാണ് സ്ലാട്ടൻ എന്നാണ് ചൽഹനോളു പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” സ്ലാട്ടന്റെ പ്രായം 40 ആണ്, അല്ലാതെ 18 അല്ല. എന്റെ നാല്പതാമത്തെ വയസ്സിൽ ഞാൻ ഇത്തരത്തിലുള്ള കാര്യങ്ങളൊന്നും ചെയ്യില്ല. ആളുകളുടെ ശ്രദ്ധ നേടുക എന്നുള്ളത് മാത്രമാണ് അദ്ദേഹത്തിന്റെ ലക്ഷ്യം.ഈ സിരി എ കിരീടം നേടാൻ വേണ്ടി അദ്ദേഹം ടീമിന് ഒന്നും തന്നെ കോൺട്രിബ്യൂട്ട് ചെയ്തിട്ടില്ല. കുറഞ്ഞ മത്സരങ്ങൾ മാത്രമാണ് അദ്ദേഹം കളിച്ചിട്ടുള്ളത്. പക്ഷേ എല്ലാവരുടെയും ശ്രദ്ധ കിട്ടാൻ വേണ്ടി അദ്ദേഹം പലതും ചെയ്യും. തന്റെ ബുക്കിൽ എന്തെങ്കിലും ഒക്കെ എഴുതാൻ വേണ്ടി അദ്ദേഹത്തിന് കാര്യങ്ങൾ വേണം. അതിനുവേണ്ടി എപ്പോഴും അദ്ദേഹം എന്നെ വിളിക്കുമായിരുന്നു. എനിക്കിപ്പോൾ സത്യസന്ധമായി ഒരു കാര്യം പറയാനുണ്ട്. ഇനി എന്നെ ശല്യപ്പെടുത്തരുത് ” ഇതാണ് ചൽഹനോളു പറഞ്ഞിട്ടുള്ളത്.

കഴിഞ്ഞ സീസണിൽ സിരി എയിൽ 23 മത്സരങ്ങളാണ് സ്ലാട്ടൻ കളിച്ചിട്ടുള്ളത്. 8 ഗോളുകളാണ് താരം നേടിയിട്ടുള്ളത്. പല മത്സരങ്ങളും പരിക്കുമൂലം അദ്ദേഹത്തിന് നഷ്ടമാവുകയായിരുന്നു.