ഉജ്ജ്വലഗോളുകളുമായി ക്രിസ്റ്റ്യാനോ, ദിബാല, കോസ്റ്റ; തകർപ്പൻ വിജയവുമായി യുവന്റസ്

സിരി എയിൽ ഇന്നലെ നടന്ന ഇരുപത്തിയൊമ്പതാം റൗണ്ട് പോരാട്ടത്തിൽ വമ്പൻമാരായ യുവന്റസിന് തകർപ്പൻ ജയം. ഒന്നിനെതിരെ മൂന്ന് ഗോളുകൾക്കാണ് യുവന്റസ് ജെനോവയെ തകർത്തു വിട്ടത്. മത്സരത്തിൽ പിറന്ന നാല് ഗോളുകളും തകർപ്പൻ ഗോളുകളായിരുന്നു എന്നാണ് പ്രത്യേകത. യുവന്റസിന് വേണ്ടി സൂപ്പർ താരങ്ങളായ പൌലോ ദിബാല, ക്രിസ്റ്റ്യാനോ റൊണാൾഡോ, ഡഗ്ളസ് കോസ്റ്റ എന്നിവർ ഗോൾ നേടിയപ്പോൾ ആൻഡ്രിയ പിനാമോന്റിയാണ് ജെനോവയുടെ ആശ്വാസഗോൾ നേടിയത്. രണ്ടാം പകുതിയിലാണ് മത്സരത്തിലെ നാല് ഗോളുകളും പിറന്നത്. ജയത്തോടെ ഇരുപത്തിയൊമ്പത് മത്സരങ്ങളിൽ നിന്ന് 72 പോയിന്റ് നേടി ഒന്നാം സ്ഥാനം ഭദ്രമാക്കാൻ യുവന്റസിന് സാധിച്ചു. 68 പോയിന്റോടെ ലാസിയോ ആണ് രണ്ടാം സ്ഥാനത്ത്.

ആദ്യപകുതിയിൽ സൂപ്പർ താരം ക്രിസ്റ്റ്യാനോ റൊണാൾഡോ ഒട്ടേറെ തവണ ഗോളിലേക്ക് ലക്ഷ്യം വെച്ചെങ്കിലും ജെനോവ ഗോൾകീപ്പർ മാറ്റിയ പെറിന്റെ തകർപ്പൻ സേവുകൾ വിലങ്ങുതടിയാവുകയായിരുന്നു. എന്നാൽ അൻപതാം മിനിറ്റിൽ ദിബാല അത് കീഴടക്കി. ക്വഡാഡോയുടെ പാസ്സ് സ്വീകരിച്ച ദിബാല രണ്ട് താരങ്ങളെ കബളിപ്പിച്ച് തൊടുത്ത ഷോട്ട് വലയിലെത്തി. അൻപത്തിയാറാം മിനുട്ടിൽ ക്രിസ്റ്റ്യാനോയുടെ ഗോൾ വന്നു. പ്യാനിക്കിൽ നിന്നും ബോൾ സ്വീകരിച്ച താരം മൈതാനമധ്യത്തിന്റെ തൊട്ടടുത്ത് നിന്ന് മുന്നേറി 25 വാര അകലെ നിന്ന് തൊടുത്ത ഷോട്ട് വലയിൽ പതിക്കുകയായിരുന്നു. വൈകാതെ ബ്രസീൽ താരത്തിന്റെ മനോഹരഗോളും പിറന്നു. ഡിബാലയിൽ നിന്ന് പന്ത് സ്വീകരിച്ച കോസ്റ്റ തൊടുത്ത മനോഹരമായ ഷോട്ട് പോസ്റ്റിന്റെ ഇടതു മൂലയിലേക്ക് ചാഞ്ഞിറങ്ങുന്നത് ഗോൾ കീപ്പർക്ക് നോക്കി നിൽക്കാനേ കഴിഞ്ഞൊള്ളൂ. 76-ആം മിനിറ്റിൽ ഒരു കരുത്തുറ്റ ഷോട്ടിലൂടെ പിനാമോന്റി ജെനോവയുടെ ആശ്വാസഗോൾ നേടി.