CR7 ടീമിനൊപ്പം ചേരുന്നില്ല,പ്രതികരിച്ച് ടെൻ ഹാഗ്!

സൂപ്പർ താരം ക്രിസ്ത്യാനോ റൊണാൾഡോ മാഞ്ചസ്റ്റർ യുണൈറ്റഡ് വിടാനുള്ള തീരുമാനത്തിൽ തന്നെയാണ്. അതുകൊണ്ടുതന്നെ അദ്ദേഹം ക്ലബ്ബിനൊപ്പം ഇതുവരെ ചേർന്നിട്ടില്ല. ഇതിനോടകം തന്നെ മൂന്ന് സൗഹൃദമത്സരങ്ങൾ മാഞ്ചസ്റ്റർ യുണൈറ്റഡ് പൂർത്തിയാക്കി കഴിഞ്ഞിട്ടുണ്ട്.

ഏതായാലും റൊണാൾഡോ ക്ലബ്ബിനൊപ്പം ചേരാത്തതുമായി ബന്ധപ്പെട്ടു കൊണ്ട് മാധ്യമപ്രവർത്തകർ കഴിഞ്ഞ ദിവസം ടെൻ ഹാഗിനോട് വിവരങ്ങൾ ആരാഞ്ഞിരുന്നു. കഴിഞ്ഞ ആഴ്ചയിലെ അതേ സ്ഥിതിഗതികളിൽ തന്നെയാണ് കാര്യങ്ങൾ ഉള്ളതെന്നും അദ്ദേഹത്തിന്റെ കാര്യത്തിൽ ആശങ്കയുണ്ട് എന്നുമാണ് ടെൻ ഹാഗ് പറഞ്ഞിട്ടുള്ളത്. റൊണാൾഡോയെ കാത്തുനിൽക്കാൻ ആവില്ലെന്നും വരുന്ന സമയത്ത് അദ്ദേഹത്തെ ടീമുമായി സംയോജിപ്പിക്കുമെന്നും ടെൻ ഹാഗ് കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” റൊണാൾഡോയുടെ കാര്യത്തിൽ പുതുതായി ഒന്നും സംഭവിച്ചിട്ടില്ല. കഴിഞ്ഞ ആഴ്ചയിലെ അതേ സ്ഥിതിയിൽ തന്നെയാണ്. അദ്ദേഹത്തിന്റെ കാര്യത്തിൽ ആശങ്കയുണ്ട്. ഒരുപക്ഷേ ഇവിടെ ഉപയോഗിക്കേണ്ട ശരിയായ വാചകം ആശങ്ക എന്നായിരിക്കില്ല.ഞാൻ ഏതായാലും നിലവിലെ താരങ്ങളിൽ ശ്രദ്ധ കേന്ദ്രീകരിച്ചിരിക്കുകയാണ്.നല്ല രൂപത്തിലാണ് താരങ്ങൾ കാര്യങ്ങളെ മുന്നോട്ടുകൊണ്ടുപോകുന്നത്. എനിക്കൊരിക്കലും അദ്ദേഹത്തെ കാത്തുനിൽക്കാനാവില്ല. ഇനി അദ്ദേഹം വരികയാണെങ്കിൽ അദ്ദേഹത്തെ ടീമുമായി സംയോജിപ്പിക്കും ” ഇതാണ് ടെൻ ഹാഗ് പറഞ്ഞിട്ടുള്ളത്.

ഏതായാലും തന്റെ ഭാവിയുടെ കാര്യത്തിൽ നിലവിൽ റൊണാൾഡോ തന്നെയാണ് ഒരു അന്തിമ തീരുമാനം എടുക്കേണ്ടത്.