സോൾഷെയർ യുണൈറ്റഡിന് പറ്റിയ ആളല്ല : ബെർബറ്റോവ്!

മാഞ്ചസ്റ്റർ യുണൈറ്റഡിനെ സംബന്ധിച്ചിടത്തോളം അവർ വലിയ പ്രതിസന്ധിഘട്ടത്തിലൂടെയാണ് കടന്നു പോയികൊണ്ടിരിക്കുന്നത്. കഴിഞ്ഞ നാല് പ്രീമിയർ ലീഗ് മത്സരങ്ങളിൽ ഒന്നിൽ പോലും വിജയിക്കാൻ സാധിക്കാത്തതിനാൽ വലിയ വിമർശനങ്ങളായിരുന്നു അവർക്ക് ഏറ്റു വാങ്ങേണ്ടി വന്നിരുന്നത്. കഴിഞ്ഞ മത്സരത്തിൽ ലിവർപൂളിനോട് എതിരില്ലാത്ത അഞ്ച് ഗോളുകൾക്ക്‌ സ്വന്തം മൈതാനത്ത് തകർന്നടിഞ്ഞത് ഈ നാണക്കേടിന്റെ ആഴം വർധിപ്പിച്ചു.

ഏതായാലും യുണൈറ്റഡിന്റെ പരിശീലകനായ സോൾഷെയർക്കെതിരെ വിമർശനങ്ങളുമായി രംഗത്ത് വന്നിരിക്കുകയാണിപ്പോൾ മുൻ താരമായിരുന്ന ദിമിത്രി ബെർബറ്റോവ്.സോൾഷെയർ യുണൈറ്റഡിന് പറ്റിയ പരിശീലകനല്ല എന്നാണ് ബെർബറ്റോവ് പറഞ്ഞിട്ടുള്ളത്. കഴിഞ്ഞ ദിവസം ബെറ്റ്ഫയറിനോട് സംസാരിക്കുകയായിരുന്നു അദ്ദേഹം.

” ലിവർപൂളിനേതിരെയുള്ള മത്സരം വിലയിരുത്തുകയാണെങ്കിൽ, യുണൈറ്റഡിനെ മുന്നോട്ട് കൊണ്ട് പോവാൻ പറ്റിയ പരിശീലകനല്ല സോൾഷെയർ.ചില ആരാധകർക്ക്‌ ലിവർപൂളിനെതിരെയുള്ള മത്സരമായിരുന്നു ഏറ്റവും പ്രധാനപ്പെട്ടത്. സിറ്റിയെ തോൽപ്പിക്കുന്നതിനേക്കാൾ കൂടുതൽ അവർ ലിവർപൂളിനെ തോൽപ്പിക്കാൻ ആഗ്രഹിച്ചിരുന്നു.നമ്മൾ വലിയ രീതിയിലാണ് നോക്കി കാണേണ്ടത്.ഇനിയും ഒരുപാട് മത്സരങ്ങൾ വരാനുണ്ട്.ഇനിയുള്ള ഒന്നോ രണ്ടോ മത്സരങ്ങളിൽ വിജയില്ലെങ്കിൽ സോൾഷെയർ വലിയ പ്രശ്നത്തിൽ അകപ്പെടും.അദ്ദേഹത്തിന്റെ സ്ഥാനം സുരക്ഷിതമാണ് എന്ന് ഞാൻ ചിലയിടത്ത് വായിച്ചു. എന്നാൽ ഇനിയുള്ള ഒന്നോ രണ്ടോ മത്സരങ്ങളിൽ യുണൈറ്റഡ് പരാജയപ്പെട്ടാൽ, അവർ പുതിയ പരിശീലകനെ തേടുന്നതിൽ അത്ഭുതപ്പെടാനില്ല ” ബെർബറ്റോവ് പറഞ്ഞു.

ഇനി ടോട്ടൻഹാമിനെയാണ് യുണൈറ്റഡ് പ്രീമിയർ ലീഗിൽ നേരിടുക.വരുന്ന ശനിയാഴ്ച്ച രാത്രി 10 മണിക്കാണ് ഈ മത്സരം അരങ്ങേറുക.