സൂപ്പർ താരനിര ഇറങ്ങിയിട്ടും തോൽവി പിണഞ്ഞ് മാഞ്ചസ്റ്റർ സിറ്റി!

ഇന്ന് നടന്ന പ്രീ സീസൺ സൗഹൃദ മത്സരത്തിൽ വമ്പന്മാരായ മാഞ്ചസ്റ്റർ സിറ്റിക്ക് പരാജയം. ഒന്നിനെതിരെ 2 ഗോളുകൾക്കാണ് സിറ്റിയെ സ്പാനിഷ് വമ്പൻമാരായ അത്ലറ്റിക്കോ മാഡ്രിഡ് പരാജയപ്പെടുത്തിയത്. മത്സരത്തിന്റെ രണ്ടാം പകുതിയിലാണ് ഈ മൂന്ന് ഗോളുകളും പിറന്നിട്ടുള്ളത്.

സൂപ്പർ താരനിര തന്നെ മാഞ്ചസ്റ്റർ സിറ്റിക്ക് വേണ്ടി കളത്തിലേക്ക് ഇറങ്ങിയിരുന്നു.ഹാലന്റ്,ആൽവരസ്,സിൽവ,ഡി ബ്രൂയിന എന്നിവരൊക്കെ സിറ്റിയുടെ സ്റ്റാർട്ടിങ് ഇലവനിൽ ഉണ്ടായിരുന്നു. അതേസമയം ഗ്രീസ്മാൻ,മൊറാറ്റ എന്നിവരൊക്കെ അത്ലറ്റിക്കോയുടെ മുന്നേറ്റ നിരയിൽ ഉണ്ടായിരുന്നു. ആദ്യ പകുതിയിൽ ഗോളുകൾ ഒന്നും പിറന്നിരുന്നില്ല.

മത്സരത്തിന്റെ 66ആം മിനിട്ടിലാണ് ഡീപെയുടെ ഗോൾ വന്നത്. 74ആം മിനിറ്റിൽ കരാസ്ക്കോ ഗോൾ കണ്ടെത്തുകയായിരുന്നു.ഇതോടെ അത്‌ലറ്റിക്കോ രണ്ട് ഗോളുകൾക്ക് മുന്നിലായി.86ആം മിനുട്ടിൽ ഡയസ് ഒരു ഗോൾ മടക്കിയെങ്കിലും വിജയിക്കാൻ സിറ്റിക്ക് അത് മതിയാകുമായിരുന്നില്ല. കഴിഞ്ഞ രണ്ട് മത്സരങ്ങളിലും വിജയിച്ച സിറ്റി ഇത്തവണ പരാജയം രുചിക്കുകയായിരുന്നു.