സലാ വെറും സെൽഫിഷ്: ലിവർപൂൾ ഇതിഹാസം സോനസ്

പതിവ് പോലെ ഈ സീസണിലും മികച്ച പ്രകടനം നടത്താൻ സൂപ്പർ താരം മുഹമ്മദ് സലാക്ക് സാധിക്കുന്നുണ്ട്.പ്രീമിയർ ലീഗിൽ 17 ഗോളുകളും 9 അസിസ്റ്റുകളും അദ്ദേഹം സ്വന്തമാക്കിയിട്ടുണ്ട്. പക്ഷേ കഴിഞ്ഞ മത്സരത്തിൽ ലിവർപൂൾ പരിശീലകനായ ക്ലോപുമായി സലാ ഉടക്കിയിരുന്നു. പകരക്കാരനായി കളിക്കളത്തിലേക്ക് വരുന്ന സമയത്താണ് സലായും ക്ലോപും തമ്മിൽ വാക്ക് തർക്കത്തിൽ ഏർപ്പെട്ടത്.

ഇത് ലിവർപൂളിന് നാണക്കേട് സൃഷ്ടിക്കുന്ന ഒരു കാര്യമായിരുന്നു.ഇക്കാര്യത്തിൽ രണ്ടുപേർക്കും ഒരുപോലെ വിമർശനങ്ങൾ ഏൽക്കേണ്ടി വരുന്നുണ്ട്. ലിവർപൂൾ ഇതിഹാസമായ ഗ്രെയിം സോനസ് ഈ വിഷയത്തിൽ സലായെയാണ് കുറ്റപ്പെടുത്തിയിരിക്കുന്നത്.സലാ വെറും സെൽഫിഷാണ് എന്നാണ് ഇദ്ദേഹം പറഞ്ഞിട്ടുള്ളത്.സോനസിന്റെ വാക്കുകൾ ഇങ്ങനെയാണ്.

” എനിക്ക് തോന്നുന്നത് സലാ വരുന്ന ട്രാൻസ്ഫർ വിൻഡോയിൽ ക്ലബ്ബ് വിടും എന്നാണ്.അദ്ദേഹം ലിവർപൂളിൽ മികച്ച രൂപത്തിലാണ് കളിച്ചിട്ടുള്ളത്.കഴിഞ്ഞ മത്സരത്തിൽ സ്റ്റാർട്ട് ചെയ്യാൻ സാധിക്കാത്തത് കൊണ്ടാണ് അദ്ദേഹം ദേഷ്യം പ്രകടിപ്പിച്ചത്. ഞാൻ കണ്ടിട്ടുള്ളതിൽ വച്ച് ഏറ്റവും സെൽഫിഷ് താരം സലായാണ്. മത്സരത്തിന്റെ ഗതിയനുസരിച്ച് പരിശീലകൻ മാറ്റങ്ങൾ വരുത്തുന്നത് അംഗീകരിക്കാൻ അദ്ദേഹം തയ്യാറല്ല. അദ്ദേഹത്തെ പിൻവലിക്കുമ്പോൾ പോലും അദ്ദേഹം വളരെയധികം ദേഷ്യപ്പെട്ടു കൊണ്ടാണ് പുറത്തുപോവുക.സാഡിയോ മാനെയുമായി ഉണ്ടായ പ്രശ്നത്തിൽ നമ്മൾ ഇത് കണ്ടതാണ്. അദ്ദേഹം ലിവർപൂളിൽ വലിയ സ്വാധീനം ഉണ്ടാക്കി എന്നുള്ളത് ശരിയാണ്. പക്ഷേ അദ്ദേഹം സെൽഫിഷ് ആണ് “ഇതാണ് സോനസ് പറഞ്ഞിട്ടുള്ളത്.

കഴിഞ്ഞ സമ്മർ ട്രാൻസ്ഫർ വിൻഡോയിൽ സൗദി അറേബ്യൻ ക്ലബ്ബായ അൽ ഇത്തിഹാദ് താരത്തിന് വേണ്ടി ശ്രമങ്ങൾ നടത്തിയിരുന്നു.എന്നാൽ ലിവർപൂൾ താരത്തെ വിടാൻ തയ്യാറായിരുന്നില്ല.ഇത്തവണയും ഒരു വലിയ ഓഫർ താരത്തിന് നൽകാനുള്ള ഒരുക്കത്തിലാണ് സൗദി ക്ലബ്ബ് ഉള്ളത്.സലാ ലിവർപൂൾ വിടാനുള്ള സാധ്യത ഇത്തവണ കൂടുതലാണ്.