വിശ്വരൂപം പൂണ്ട് കവാനി, അവിശ്വസനീയ തിരിച്ചു വരവിലൂടെ വിജയം കൊയ്ത് ചുവന്നചെകുത്താൻമാർ !

പ്രീമിയർ ലീഗിൽ അല്പം മുമ്പ് നടന്ന മത്സരത്തിൽ അത്യുജ്ജ്വല തിരിച്ചു വരവ് നടത്തി മാഞ്ചസ്റ്റർ യുണൈറ്റഡ്. രണ്ടിനെതിരെ മൂന്ന് ഗോളുകൾക്കാണ് യുണൈറ്റഡ് സതാംപ്റ്റണെ കീഴടക്കിയത്. രണ്ട് ഗോളുകൾക്ക്‌ പിറകിൽ നിന്ന ശേഷം മൂന്ന് ഗോളുകൾ നേടിക്കൊണ്ടാണ് മാഞ്ചസ്റ്റർ യുണൈറ്റഡ് വിജയം കൊയ്തത്. രണ്ട് ഗോളും ഒരു അസിസ്റ്റുമായി തിളങ്ങിയ കവാനി ചുവന്നചെകുത്താൻമാരുടെ ഹീറോയായി മാറുകയായിരുന്നു. ഇരട്ടഗോളുകൾ നേടിയ കവാനിക്ക്‌ പുറമേ ബ്രൂണോ ഫെർണാണ്ടസാണ് ഒരു ഗോൾ നേടിയത്. ജയത്തോടെ മാഞ്ചസ്റ്റർ യുണൈറ്റഡ് പോയിന്റ് ടേബിളിൽ ഏഴാം സ്ഥാനത്തേക്ക് കയറി. ഒമ്പത് മത്സരങ്ങളിൽ നിന്ന് പതിനാറ് പോയിന്റാണ് യുണൈറ്റഡിന്റെ സമ്പാദ്യം. പതിനേഴ് പോയിന്റുള്ള സതാംപ്റ്റൺ അഞ്ചാം സ്ഥാനത്താണ്.

മത്സരത്തിന്റെ 23-ആം മിനുട്ടിൽ ജാൻ ബെഡ്നാറെക്കും 33-ആം മിനുട്ടിൽ ജെയിംസ് വാർഡ് പ്രൌസും നേടിയ ഗോളിൽ സതാംപ്റ്റൺ ലീഡ് നേടിയിരുന്നു. എന്നാൽ രണ്ടാം പകുതിയിൽ കളി മാറിമറിയുകയായിരുന്നു. കവാനിയുടെ വിശ്വരൂപമാണ് പിന്നീട് കണ്ടത്. 59-ആം മിനുട്ടിൽ കവാനിയുടെ അസിസ്റ്റിൽ നിന്ന് ബ്രൂണോ ഗോൾ നേടുകയായിരുന്നു. 74-ആം മിനുട്ടിൽ കവാനിയുടെ ആദ്യ ഗോൾ വന്നു. ഒടുവിൽ 93-ആം മിനിറ്റിൽ കവാനിയുടെ വിജയഗോളും വന്നു. റാഷ്ഫോർഡിന്റെ ക്രോസിൽ നിന്ന് ഒരു ഹെഡറിലൂടെയാണ് താരം ഗോൾ കണ്ടെത്തിയത്. ഒരു ഘട്ടത്തിൽ വിജയം ഉറപ്പിച്ചിരുന്ന സതാംപ്റ്റൺ തോൽവിയിലേക്ക് കൂപ്പുകുത്തുകയായിരുന്നു.