റൊണാൾഡോയോട് നിങ്ങൾ കാണിക്കുന്നത് കടുത്ത അനാദരവ് : യുണൈറ്റഡിനെതിരെ രൂക്ഷവിമർശനവുമായി റോയ് കീൻ!

ഇന്നലെ പ്രീമിയർ ലീഗിൽ നടന്ന മത്സരത്തിൽ മാഞ്ചസ്റ്റർ യുണൈറ്റഡിന് നാണംകെട്ട തോൽവി ഏറ്റുവാങ്ങേണ്ടി വന്നിരുന്നു. മൂന്നിനെതിരെ ആറു ഗോളുകൾക്കാണ് മാഞ്ചസ്റ്റർ സിറ്റി യുണൈറ്റഡിനെ തകർത്തുവിട്ടത്.മത്സരത്തിന്റെ സ്റ്റാർട്ടിങ് ഇലവനിൽ സൂപ്പർ താരം ക്രിസ്റ്റ്യാനോ റൊണാൾഡോയെ ഉൾപ്പെടുത്താൻ ടെൻ ഹാഗ് തയ്യായിരുന്നില്ല. ഈ പ്രീമിയർ ലീഗിൽ കേവലം ഒരു മത്സരത്തിൽ മാത്രമാണ് ഇതുവരെ റൊണാൾഡോ സ്റ്റാർട്ട് ചെയ്തിട്ടുള്ളത്.

ഏതായാലും മാഞ്ചസ്റ്റർ യുണൈറ്റഡ് ഇതിഹാസമായ റോയ് കീൻ ഇപ്പോൾ ഈ വിഷയത്തിൽ ടെൻ ഹാഗിനെതിരെ രൂക്ഷ വിമർശനം ഉന്നയിച്ചിട്ടുണ്ട്. റൊണാൾഡോയോട് കാണിക്കുന്നത് കടുത്ത അനാദരവാണ് എന്നാണ് റോയ് കീൻ പറഞ്ഞിട്ടുള്ളത്. സീസൺ മുന്നോട്ടു പോകുന്തോറും ഇതു കൂടുതൽ മോശമായി വരുന്നുവെന്നും കീൻ കൂട്ടിച്ചേർത്തിട്ടുണ്ട്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട്‌ ചെയ്യുന്നത് ഇങ്ങനെയാണ്.

” റൊണാൾഡോയോട് മാഞ്ചസ്റ്റർ യുണൈറ്റഡ് കാണിക്കുന്നത് അനാദരവാണ് എന്നാണ് ഞാൻ കരുതുന്നത്. ഈ ട്രാൻസ്ഫർ വിൻഡോയിൽ അദ്ദേഹത്തെ യുണൈറ്റഡ് പോവാൻ അനുവദിക്കണമായിരുന്നു.യുണൈറ്റഡ് പരിശീലകൻ അദ്ദേഹത്തെ പിടിച്ചു നിർത്തുകയായിരുന്നു എന്നാണ് എനിക്ക് തോന്നുന്നത്.തനിക്ക് വേറെ സ്ട്രൈക്കർമാർ ഇല്ല എന്നാണ് ടെൻ ഹാഗ് പറഞ്ഞിരുന്നത്.എന്നിട്ട് ബെഞ്ചിൽ ഇരുത്താൻ വേണ്ടിയാണോ അദ്ദേഹം റൊണാൾഡോയെ പിടിച്ചു വെച്ചത്. എക്കാലത്തെയും മികച്ച താരങ്ങളിൽ ഒരാളാണ് റൊണാൾഡോ എന്ന് മറക്കരുത്.അദ്ദേഹത്തിന് മുന്നിൽ ഓപ്ഷനുകൾ ഉണ്ടായിരുന്നു.എന്നാൽ യുണൈറ്റഡാണ് തടസ്സം നിന്നത്. സീസൺ മുന്നോട്ടു പോകുന്തോറും കാര്യങ്ങൾ കൂടുതൽ മോശമായി കൊണ്ടിരിക്കുകയാണ് ” ഇതാണ് റോയ് കീൻ പറഞ്ഞത്.

ഈ സീസണിൽ കേവലം ഒരു പെനാൽറ്റി ഗോൾ മാത്രമാണ് റൊണാൾഡോക്ക് നേടാൻ കഴിഞ്ഞിട്ടുള്ളത്. ഇനി യുണൈറ്റഡ് തങ്ങളുടെ അടുത്ത മത്സരം യൂറോപ്പ ലീഗിലാണ് കളിക്കുക. ആ മത്സരത്തിന്റെ ആദ്യ ഇലവനിൽ റൊണാൾഡോ ഉണ്ടാകുമെന്നാണ് പ്രതീക്ഷിക്കപ്പെടുന്നത്.