യുണൈറ്റഡ് സൂപ്പർ താരത്തെ പിഎസ്ജിക്ക് വേണം, നല്ല കാര്യമെന്ന് ടെൻ ഹാഗ്!

മാഞ്ചസ്റ്റർ യുണൈറ്റഡിന്റെ ഇംഗ്ലീഷ് സൂപ്പർ താരമായ മാർക്കസ് റാഷ്ഫോർഡ് ഇപ്പോൾ തകർപ്പൻ ഫോമിലാണ് കളിച്ചുകൊണ്ടിരിക്കുന്നത്. ഈ പ്രീമിയർ ലീഗിൽ 9 ഗോളുകളും മൂന്ന് അസിസ്റ്റുകളും കരസ്ഥമാക്കാൻ താരത്തിന് കഴിഞ്ഞിട്ടുണ്ട്. താരത്തിന്റെ യുണൈറ്റഡുമായുള്ള കരാർ യഥാർത്ഥത്തിൽ ഈ സീസണോടുകൂടിയായിരുന്നു അവസാനിക്കേണ്ടിയിരുന്നത്. എന്നാൽ ഒരു വർഷത്തേക്ക് കൂടി നീട്ടാനുള്ള ഓപ്ഷൻ മാഞ്ചസ്റ്റർ യുണൈറ്റഡ് ഉപയോഗപ്പെടുത്തുകയായിരുന്നു.

എന്നിരുന്നാലും ഈ വരുന്ന സമ്മർ ട്രാൻസ്ഫർ വിൻഡോയിൽ റാഷ്ഫോർഡിനെ സ്വന്തമാക്കാൻ ഫ്രഞ്ച് വമ്പൻമാരായ പിഎസ്ജി താല്പര്യപ്പെടുന്നുണ്ട്. ഇതേക്കുറിച്ച് മാഞ്ചസ്റ്റർ യുണൈറ്റഡിന്റെ പരിശീലകനായ എറിക്ക് ടെൻ ഹാഗിനോട് ചോദിക്കപ്പെട്ടിരുന്നു. മറ്റുള്ള ക്ലബ്ബുകൾ യുണൈറ്റഡ് താരങ്ങളിൽ താൽപര്യം പ്രകടിപ്പിക്കുന്നത് നല്ല കാര്യമാണെന്നും അതിനർത്ഥം തങ്ങളുടെ താരങ്ങളും മികച്ച രൂപത്തിൽ കളിക്കുന്നുണ്ട് എന്നുമാണ് ടെൻ ഹാഗ് പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.

” ഞങ്ങളുടെ എല്ലാ താരങ്ങളിലും മറ്റുള്ള ക്ലബ്ബുകൾ താൽപ്പര്യം പ്രകടിപ്പിക്കുമെന്നാണ് ഞാൻ പ്രതീക്ഷിക്കുന്നത്. കാരണം അവർ ഇപ്പോൾ വളരെ മികച്ച രൂപത്തിലാണ് കളിച്ചുകൊണ്ടിരിക്കുന്നത്. മറ്റുള്ള ക്ലബ്ബുകൾ താത്പര്യം പ്രകടിപ്പിക്കുന്നു എന്നതിനർത്ഥം അവർ നല്ല രൂപത്തിൽ മുന്നോട്ടുപോകുന്നു എന്നുള്ളതാണ്.പക്ഷേ എനിക്കിപ്പോൾ പറയാനുള്ളത് ഇതാണ് ഏറ്റവും മികച്ച സ്ഥലം. കാരണം ഞങ്ങൾ മികച്ച ടീമിനെ നിർമിക്കാനാണ് ലക്ഷ്യമിടുന്നത്.ആദ്യം ഇംഗ്ലണ്ടിലെ മികച്ച ടീം ആവണം. പിന്നീട് യൂറോപ്പിലെയും ലോകത്തിലെയും മികച്ച ടീമായി മാറണം ” ഇതാണ് ടെൻ ഹാഗ് പറഞ്ഞിട്ടുള്ളത്.

ഏതായാലും റാഷ്ഫോർഡ് നിലവിൽ മാഞ്ചസ്റ്റർ യുണൈറ്റഡ് വിടാനുള്ള യാതൊരുവിധ സാധ്യതകളും ഇല്ല. ടീമിന്റെ മുന്നേറ്റ നിരയിലെ ഇപ്പോഴത്തെ ഏറ്റവും പ്രധാനപ്പെട്ട താരമായി മാറാൻ ഈയൊരു സൂപ്പർതാരത്തിന് സാധിച്ചിട്ടുണ്ട്.