യുണൈറ്റഡ് എന്നെ ചതിച്ചു : ഗുരുതര ആരോപണങ്ങളുമായി ക്രിസ്റ്റ്യാനോ റൊണാൾഡോ.

സൂപ്പർ താരം ക്രിസ്റ്റ്യാനോ റൊണാൾഡോയെ സംബന്ധിച്ചിടത്തോളം ഈ സീസൺ അത്ര നല്ല രൂപത്തിലല്ല. താരത്തിന് കളിക്കാനുള്ള അവസരങ്ങൾ വളരെ കുറച്ച് മാത്രമായിരുന്നു പരിശീലകൻ നൽകിയിരുന്നത്.ആ അവസരങ്ങളിൽ തിളങ്ങാൻ അദ്ദേഹത്തിന് കഴിഞ്ഞതുമില്ല. മാത്രമല്ല പലപ്പോഴും വിവാദങ്ങൾ ഉണ്ടാക്കുന്ന പ്രവർത്തി അദ്ദേഹത്തിന്റെ ഭാഗത്തുണ്ടാവുകയും ചെയ്തിരുന്നു.

മാഞ്ചസ്റ്റർ യുണൈറ്റഡിൽ നിലവിൽ റൊണാൾഡോ ഹാപ്പിയല്ല എന്നുള്ളത് വ്യക്തമായ ഒരു കാര്യമാണ്. എന്നാൽ അക്കാര്യം ഇപ്പോൾ റൊണാൾഡോ തന്നെ തുറന്നു പറഞ്ഞിട്ടുണ്ട്. മാഞ്ചസ്റ്റർ യുണൈറ്റഡ് തന്നെ ചതിച്ചതായി അനുഭവപ്പെട്ടു എന്നാണ് റൊണാൾഡോ ഇപ്പോൾ പറഞ്ഞിട്ടുള്ളത്.പിയേഴ്‌സ് മോർഗന് നൽകിയ അഭിമുഖത്തിൽ സംസാരിക്കുകയായിരുന്നു റൊണാൾഡോ.അദ്ദേഹത്തിന്റെ വാക്കുകൾ ഇങ്ങനെയാണ്.

” എന്നെ ക്ലബ്ബിൽ നിന്നും പുറത്താക്കാൻ പലരും ശ്രമിച്ചു.പരിശീലകൻ മാത്രമല്ല. ക്ലബ്ബിലുള്ള രണ്ട് മൂന്ന് വ്യക്തികൾ അതിനു വേണ്ടി പരിശ്രമിച്ചിരുന്നു.മാഞ്ചസ്റ്റർ യുണൈറ്റഡിൽ ഞാൻ ചതിക്കപ്പെട്ടതായാണ് എനിക്കിപ്പോൾ അനുഭവപ്പെടുന്നത്.ആളുകൾ സത്യം മനസ്സിലാക്കണം.എന്നെ ചതിക്കുകയാണ് ഇവിടെ ചെയ്തിട്ടുള്ളത്.ഈ വർഷം മാത്രമല്ല, കഴിഞ്ഞ വർഷവും ഞാനിവിടെ ഉണ്ടായിരിക്കുന്നത് ആഗ്രഹിക്കാത്ത കുറച്ച് ആളുകൾ ക്ലബ്ബിനകത്തുണ്ട് ” ഇതാണ് റൊണാൾഡോ പറഞ്ഞിട്ടുള്ളത്.

ഇതോടെ റൊണാൾഡോയും യുണൈറ്റഡും തമ്മിലുള്ള പോര് മറനീക്കി പുറത്തേക്ക് വന്നിരിക്കുകയാണ്. വരുന്ന ജനുവരി ട്രാൻസ്ഫർ ജാലകത്തിൽ റൊണാൾഡോ മാഞ്ചസ്റ്റർ യുണൈറ്റഡ് വിടും എന്നുള്ള സൂചന കൂടിയാണ് താരത്തിന്റെ ഈ തുറന്നുപറച്ചിൽ നൽകുന്നത്.