യുണൈറ്റഡിന്റെ പ്രശ്നങ്ങൾ തീർക്കാൻ സൗദിയിൽ നിന്നും അദ്ദേഹത്തെ കൊണ്ടുവരൂ: ഉപദേശവുമായി സാഹ.

വളരെ മോശം പ്രകടനമാണ് ഇപ്പോൾ മാഞ്ചസ്റ്റർ യുണൈറ്റഡ് ഈ സീസണിൽ നടത്തിക്കൊണ്ടിരിക്കുന്നത്.നിരവധി തോൽവികൾ അവർക്ക് ഈ സീസണിൽ ഏറ്റുവാങ്ങേണ്ടി വന്നിട്ടുണ്ട്. ഗോളുകളുടെ കാര്യത്തിൽ ക്ഷാമം നേരിടേണ്ടി വരുന്നത് യുണൈറ്റഡിന്റെ ഏറ്റവും വലിയ പ്രതിസന്ധിയാണ്. നമ്പർ നയൻ സ്ട്രൈക്കർ പൊസിഷനിൽ കളിക്കുന്ന റാസ്മസ് ഹൊയ്ലുണ്ടിന് തിളങ്ങാൻ കഴിയാത്തത് വലിയ തലവേദനയാണ് സൃഷ്ടിക്കുന്നത്.

ഈയൊരു അവസ്ഥയിൽ മാഞ്ചസ്റ്റർ യുണൈറ്റഡിന്റെ മുൻ താരമായിരുന്ന ലൂയിസ് സാഹ ചില ഉപദേശങ്ങൾ നൽകിയിട്ടുണ്ട്. അതായത് സൗദി അറേബ്യയിൽ നിന്നും സൂപ്പർതാരമായ കരിം ബെൻസിമയെ കൊണ്ടുവന്നാൽ യുണൈറ്റഡിന്റെ പല പ്രശ്നങ്ങളും അവസാനിക്കും എന്നാണ് സാഹ പറഞ്ഞിട്ടുള്ളത്.ബെൻസിമയെ പോലെയൊരു താരത്തെയാണ് ഇപ്പോൾ യുണൈറ്റഡ് മിസ്സ് ചെയ്യുന്നതെന്നും സാഹ കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

“യുണൈറ്റഡിന്റെ മുന്നേറ്റനിരയെ ഊർജ്ജസ്വലമാക്കാൻ ബെൻസിമക്ക് സാധിക്കും.ബെൻസിമയെ പോലെയുള്ള ഒരു താരത്തെയാണ് ഇപ്പോൾ അവർക്ക് ആവശ്യം.അദ്ദേഹത്തിന് മികച്ച പ്രകടനം നടത്താനും ഒരുപാട് ഗോളുകൾ നേടാനും സാധിക്കും.അദ്ദേഹം വളരെയധികം പ്രൊഫഷണൽ ആയിട്ടുള്ള ഒരു താരമാണ്.ഹൊയ്ലുണ്ട് അദ്ദേഹത്തിൽ നിന്നും പഠിക്കേണ്ടതുണ്ട്.ഹൊയ്ലുണ്ട് ശരിയായ ക്ലബ്ബിൽ തന്നെയാണ് എത്തിയിട്ടുള്ളത്. പക്ഷേ നമ്പർ 9 സ്ട്രൈക്കറുടെ ഭാരം ഇപ്പോൾ തന്നെ അദ്ദേഹത്തിന് ഏൽപ്പിച്ചത് ശരിയായില്ല.പ്രത്യേകിച്ച് എക്സ്പീരിയൻസ് ഇല്ലാത്ത താരങ്ങളോടൊപ്പം ആണ് അവർ കളിക്കുന്നത്. ഒരു മികച്ച സ്ട്രൈക്കർക്ക് വേണ്ട മെന്റാലിറ്റി ഹൊയ്ലുണ്ടിൽ എനിക്ക് കാണാൻ സാധിക്കുന്നില്ല ” ഇതാണ് സാഹ പറഞ്ഞിട്ടുള്ളത്.

സൗദി അറേബ്യൻ ക്ലബ്ബായ അൽ ഇത്തിഹാദിന് വേണ്ടി മോശമല്ലാത്ത രൂപത്തിൽ കളിക്കാൻ ഇപ്പോൾ ബെൻസിമക്ക് കഴിയുന്നുണ്ട്.15 മത്സരങ്ങളിൽ നിന്ന് 9 ഗോളുകളും 5 അസിസ്റ്റുകളും അദ്ദേഹം സ്വന്തമാക്കിയിട്ടുണ്ട്. പക്ഷേ ഇത്തിഹാദ് മോശം പ്രകടനമാണ് ഇപ്പോൾ നടത്തുന്നത്. അതുകൊണ്ടുതന്നെ ഈ താരത്തിന് ഒരുപാട് വിമർശനങ്ങൾ കേൾക്കേണ്ടി വരുന്നുണ്ട്.