യുണൈറ്റഡിന്റെ ആ ആറ് താരങ്ങൾ യഥാർത്ഥ ക്വാളിറ്റിയുള്ളവർ : ക്ലോപ് പറയുന്നു!

പ്രീമിയർ ലീഗിൽ നടക്കുന്ന മൂന്നാം റൗണ്ട് പോരാട്ടത്തിൽ ലിവർപൂളിന്റെ എതിരാളികൾ മാഞ്ചസ്റ്റർ യുണൈറ്റഡാണ്. തിങ്കളാഴ്ച രാത്രി ഇന്ത്യൻ സമയം 12:30ന് ഓൾഡ് ട്രഫോഡിൽ വെച്ചാണ് ഈയൊരു മത്സരം നടക്കുക. ഈ പ്രീമിയർ ലീഗിൽ ഇതുവരെ രണ്ട് ടീമുകൾക്കും വിജയങ്ങൾ ഒന്നും നേടാൻ കഴിഞ്ഞിട്ടില്ല. അതുകൊണ്ടുതന്നെ രണ്ട് ടീമുകൾക്കും ഈ മത്സരത്തിൽ വിജയം അനിവാര്യമാണ്.

ഏതായാലും കഴിഞ്ഞ രണ്ട് മത്സരത്തിൽ പരാജയപ്പെട്ടതിനു പിന്നാലെ വലിയ വിമർശനങ്ങൾ യുണൈറ്റഡിന്റെ മധ്യനിര താരങ്ങളായ ഫ്രഡ്‌,മക്ടോമിനി എന്നിവർക്ക് നേരിടേണ്ടി വന്നിരുന്നു. മുൻ ഇംഗ്ലീഷ് താരമായിരുന്ന അഗ്ബൻലഹോർ ഇവരെ പരസ്യമായി വിമർശിക്കുകയും ചെയ്തിരുന്നു. എന്നാൽ ഇതിന് മറുപടി നൽകിക്കൊണ്ട് ഇപ്പോൾ ലിവർപൂളിന്റെ പരിശീലകനായ ക്ലോപ് രംഗത്ത് വന്നിട്ടുണ്ട്.ഫ്രഡും മക്ടോമിനിയും ഉൾപ്പെടെ യുണൈറ്റഡിന്റെ മധ്യനിരയിലുള്ള താരങ്ങൾ എല്ലാവരും യഥാർത്ഥ ക്വാളിറ്റിയുള്ള താരങ്ങളാണ് എന്നാണ് ക്ലോപ്പ് പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ മാഞ്ചസ്റ്റർ ഈവനിംഗ് ന്യൂസ് റിപ്പോർട്ട് ചെയ്യുന്നത് ഇങ്ങനെയാണ്.

” മിഡ്‌ഫീൽഡിൽ നല്ല ക്വാളിറ്റിയുണ്ട് അവർക്ക്.എറിക്സൺ,ബ്രൂണോ ഫെർണാണ്ടസ്,ഡോണി വാൻ ഡി ബീക്ക്,ഫ്രഡ്‌,മക്ടോമിനി എന്നിവരൊക്കെ മികച്ച താരങ്ങളാണ്.ഇതിൽ ഫ്രഡിനെ അഗ്ബൻലഹോർ വിമർശിച്ചിരുന്നു. എന്നാൽ എന്റെ അഭിപ്രായത്തിൽ ഫ്രഡ്‌ മികച്ച താരമാണ്. യഥാർത്ഥ ക്വാളിറ്റിയുള്ള താരങ്ങളാണ് ഇവർ എല്ലാവരും. കൂടാതെ മുന്നേറ്റ നിരയിലുള്ള ആന്റണി മാർഷ്യലും മികച്ച താരമാണ് ” ഇതാണ് ക്ലോപ് പറഞ്ഞിട്ടുള്ളത്.

ഏതായാലും നല്ല ഒരു ഡിഫൻസീവ് മിഡ്ഫീൽഡറുടെ അഭാവമാണ് ഈ കാലമത്രയും മാഞ്ചസ്റ്റർ യുണൈറ്റഡിനെ അലട്ടിയിരുന്നത്. എന്നാൽ ഈ സ്ഥാനത്തേക്ക് ബ്രസീലിയൻ സൂപ്പർതാരമായ കാസമിറോയെ സ്വന്തമാക്കാൻ മാഞ്ചസ്റ്റർ യുണൈറ്റഡിന് കഴിഞ്ഞിട്ടുണ്ട്. താരത്തിന്റെ അരങ്ങേറ്റത്തിന് വേണ്ടിയുള്ള കാത്തിരിപ്പിലാണ് യുണൈറ്റഡ് ആരാധകരുള്ളത്.