മോട്ടോർസീഞ്ഞോ : ഫ്രഡിനെ പ്രശംസിച്ച് ടെല്ലസ്!

കഴിഞ്ഞ പ്രീമിയർ ലീഗ് മത്സരത്തിൽ ഏകപക്ഷീയമായ ഒരു ഗോളിനായിരുന്നു മാഞ്ചസ്റ്റർ യുണൈറ്റഡ് ക്രിസ്റ്റൽ പാലസിനെ പരാജയപ്പെടുത്തിയത്. മത്സരത്തിൽ യുണൈറ്റഡിന്റെ വിജയഗോൾ നേടിയത് ബ്രസീലിയൻ താരം ഫ്രഡ്‌ ആയിരുന്നു. വിയ്യാറയലിനെതിരെയുള്ള ചാമ്പ്യൻസ് ലീഗ് മത്സരത്തിലും താരം മികച്ച പ്രകടനം നടത്തിയിരുന്നു.

ഇപ്പോഴിതാ ഫ്രഡിനെ പ്രശംസിച്ച് കൊണ്ട് രംഗത്ത് വന്നിരിക്കുകയാണ് സഹതാരമായ അലക്സ് ടെല്ലസ്. മോട്ടോർസീഞ്ഞോ എന്നാണ് ടെല്ലസ് ഫ്രഡിനെ വിശേഷിപ്പിച്ചത്. ടീമിന്റെ എഞ്ചിനാണ് ഫ്രഡ്‌ എന്നാണ് ടെല്ലസ് വിശദീകരിച്ചത്. അദ്ദേഹത്തിന്റെ വാക്കുകൾ മാഞ്ചസ്റ്റർ യുണൈറ്റഡിന്റെ ഒഫീഷ്യൽ വെബ്സൈറ്റ് റിപ്പോർട്ട്‌ ചെയ്യുന്നത് ഇങ്ങനെയാണ്.

” ബ്രസീലിൽ ഫ്രഡിനെ പോലെയുള്ള താരങ്ങളെ ഞങ്ങൾ വിളിക്കുന്നത് മോട്ടോർസീഞ്ഞോ എന്നാണ്.അവരായിരിക്കും ടീമിന്റെ എഞ്ചിൻ.ഡീപായിട്ട് കളിക്കുകയും ബോളുകൾ റിക്കവർ ചെയ്യുന്നതും അവരായിരിക്കും.വിയ്യാറയലിനെതിരെയുള്ള മത്സരത്തിൽ പ്രധാനപ്പെട്ട പങ്ക് വഹിക്കാൻ അദ്ദേഹത്തിന് കഴിഞ്ഞിട്ടുണ്ട്.ഫ്രഡ്‌ പിടിച്ചെടുത്ത പന്തുകളിൽ നിന്നാണ് ഞങ്ങളുടെ രണ്ടു ഗോളുകളും പിറന്നത്.ടീമിന് അദ്ദേഹം എത്രത്തോളം പ്രധാനപ്പെട്ട താരമാണ് എന്നുള്ള കാര്യം ഞങ്ങൾക്കറിയാം.അദ്ദേഹത്തിന്റെ കാര്യത്തിൽ ഞാൻ വളരെയധികം സന്തോഷവാനാണ്.കളത്തിന് പുറത്തും അദ്ദേഹം എന്റെ അടുത്ത സുഹൃത്താണ്.അദ്ദേഹത്തിന്റെ ക്വാളിറ്റി എനിക്കിഷ്ടമാണ്. ടീമിനെ മുന്നോട്ട് നയിക്കുന്ന താരങ്ങളിൽ ഒരാളാണ് അദ്ദേഹം.സ്വന്തം പൊസിഷനെ കുറിച്ച് മാത്രമല്ല, മറ്റുള്ളവരുടെ പൊസിഷനിൽ കൂടി അദ്ദേഹം ജാഗ്രത പുലർത്തുന്നു എന്നുള്ളതും അദ്ദേഹത്തിന്റെ ക്വാളിറ്റിയാണ് ” ടെല്ലസ് പറഞ്ഞു.

കഴിഞ്ഞ യങ് ബോയ്സിനെതിരെയുള്ള മത്സരത്തിൽ യുണൈറ്റഡ് സമനില വഴങ്ങിയിരുന്നു. എന്നാൽ ഈ മത്സരത്തിൽ ഇരുവർക്കും റാൾഫ് വിശ്രമം നൽകുകയായിരുന്നു.