മാർക്കിഞ്ഞോസ് ഇനി ആഴ്സണലിന് സ്വന്തം!

ബ്രസീലിയൻ യുവസൂപ്പർ താരമായ മാർക്കിഞ്ഞോസിനെ പ്രീമിയർ ലീഗ് വമ്പന്മാരായ ആഴ്സണൽ സ്വന്തമാക്കി. ആഴ്സണൽ തന്നെയാണ് ഇക്കാര്യം ഔദ്യോഗികമായി അറിയിച്ചിട്ടുള്ളത്.ബ്രസീലിയൻ ക്ലബ്ബായ സാവോപോളോയിൽ നിന്നാണ് ഈ യുവതാരത്തെ ഗണ്ണേഴ്സ് സ്വന്തമാക്കിയിട്ടുള്ളത്.

19 വയസ്സുള്ള താരം മുന്നേറ്റനിരയിലാണ് കളിക്കാറുള്ളത്. മൂന്ന് മില്യൺ പൗണ്ടാണ് താരത്തിന് വേണ്ടി ആഴ്സണൽ ചെലവഴിച്ചിട്ടുള്ളത് എന്നാണ് അറിയാൻ സാധിക്കുന്നത്.ഈ സമ്മർ ട്രാൻസ്ഫർ ജാലകത്തിൽ ആഴ്സണൽ സ്വന്തമാക്കുന്ന ആദ്യത്തെ താരമാണ് മാർക്കിഞ്ഞോസ്.സൂപ്പർ താരം ലാക്കസാട്ടെ ക്ലബ് വിടുകയാണ് എന്നുള്ളത് ഉറപ്പായിരുന്നു. അദ്ദേഹത്തിന്റെ സ്ഥാനത്തേക്കാണ് ഈ ബ്രസീലിയൻ താരത്തെ ആർട്ടെറ്റ സ്വന്തമാക്കിയിട്ടുള്ളത്.

5 വർഷത്തെ കരാറിലായിരിക്കും താരം ഒപ്പുവെയ്ക്കുക. മറ്റൊരു പ്രീമിയർ ലീഗ് ക്ലബ്ബായ വോൾവ്സ് താരത്തിനു വേണ്ടി ശ്രമിച്ചിരുന്നുവെങ്കിലും പരാജയപ്പെടുകയായിരുന്നു. ബ്രസീലിന്റെ അണ്ടർ 16, അണ്ടർ 17 എന്നീ ടീമുകൾക്ക് വേണ്ടി മാർക്കിഞ്ഞോസ് കളിച്ചിട്ടുണ്ട്.സാവോ പോളോക്ക് വേണ്ടി ആകെ 33 മത്സരങ്ങളിലും താരം ബൂട്ടണിഞ്ഞിട്ടുണ്ട്.