മഗ്വയ്റുടെ പിഴവ്,രക്ഷിച്ച് ഒനാന,പിന്നാലെ നിർത്തിപ്പൊരിച്ച് താരം!

ഇന്ന് നടന്ന പ്രീ സീസൺ ഫ്രണ്ട്‌ലി മത്സരത്തിൽ മാഞ്ചസ്റ്റർ യുണൈറ്റഡിന് തോൽവി ഏറ്റുവാങ്ങേണ്ടി വന്നിരുന്നു. രണ്ടിനെതിരെ 3 ഗോളുകൾക്കാണ് ജർമ്മൻ ക്ലബ്ബായ ബൊറൂസിയ ഡോർട് മുണ്ട് മാഞ്ചസ്റ്റർ യുണൈറ്റഡിനെ പരാജയപ്പെടുത്തിയത്.ബൊറൂസിയക്ക് വേണ്ടി മലെൻ ഇരട്ട ഗോളുകൾ നേടിയപ്പോൾ മൗകോകോ ഒരു ഗോൾ നേടുകയായിരുന്നു. മാഞ്ചസ്റ്റർ യുണൈറ്റഡ് ഗോളുകൾ ഡിയോഗോ ഡാലോട്ട്, ആന്റണി എന്നിവരാണ് നേടിയിരുന്നത്.

ഈ മത്സരത്തിന്റെ സ്റ്റാർട്ടിങ് ഇലവനിൽ ഡിഫൻഡറായ ഹാരി മഗ്വയ്ർ ഉണ്ടായിരുന്നു. മത്സരത്തിന്റെ 47 മിനിറ്റിൽ അദ്ദേഹം ഒരു പിഴവ് വരുത്തി വെച്ചിരുന്നു. അതായത് സഹതാരത്തിന് കൃത്യമല്ലാത്ത രൂപത്തിൽ ഒരു പാസ് മഗ്വയ്ർ നൽകുകയായിരുന്നു. ഫലമായിക്കൊണ്ട് ബൊറൂസിയ പന്ത് പിടിച്ചെടുക്കുകയും അറ്റാക്ക് നടത്തുകയും ചെയ്തു. ഒടുവിൽ മാഞ്ചസ്റ്റർ യുണൈറ്റഡിന്റെ ഗോൾ കീപ്പറായ ആൻഡ്രേ ഒനാന ആ നീക്കം രക്ഷപ്പെടുത്തുകയായിരുന്നു.

യുണൈറ്റഡിന്റെ ഈ പുതിയ ഗോൾകീപ്പർ തന്റെ ദേഷ്യം മറച്ചു പിടിച്ചില്ല. മറിച്ച് ഹാരി മഗ്വയ്റോട് വളരെ രൂക്ഷമായ ഭാഷയിൽ ദേഷ്യപ്പെടുകയായിരുന്നു. ആ പിഴവ് വരുത്തി വെച്ചതിൽ കടുത്ത അസംതൃപ്തി ഈ ഗോൾകീപ്പർക്കുണ്ടായിരുന്നു. ഇതിന്റെ വീഡിയോ ട്വിറ്റർ ഉൾപ്പെടെയുള്ള സാമൂഹിക മാധ്യമങ്ങളിൽ വൈറലാണ്.ഡിഹിയയല്ല ഒനാന,മറിച്ച് അദ്ദേഹം പ്രതികരിക്കും എന്നാണ് പല യുണൈറ്റഡ് ആരാധകരും ഇതേക്കുറിച്ച് അഭിപ്രായപ്പെട്ടിരിക്കുന്നത്.

നേരത്തെയും നിരവധി പിഴവുകൾ വരുത്തി വെച്ചിട്ടുള്ള ഡിഫൻഡറാണ് മഗ്വയ്ർ. പക്ഷേ ഗോൾ കീപ്പറായ ഡിഹിയ അതിനോട് പ്രതികരിക്കാറില്ല.മഗ്വയ്റെ ഒഴിവാക്കാനുള്ള ശ്രമങ്ങൾ ഇപ്പോൾ മാഞ്ചസ്റ്റർ യുണൈറ്റഡ് നടത്തുന്നുണ്ട്. പക്ഷേ അദ്ദേഹം ക്ലബ്ബിൽ തന്നെ തുടരാനാണ് ആഗ്രഹിക്കുന്നത്.കഴിഞ്ഞ രണ്ടു മത്സരങ്ങളിൽ നിന്ന് അഞ്ചു ഗോളുകളാണ് യുണൈറ്റഡിന് വഴങ്ങേണ്ടി വന്നിട്ടുള്ളത്.