ബ്രസീലിയൻ സൂപ്പർ താരത്തെ സ്വന്തമാക്കണം,ഓഫർ നൽകി ബാഴ്സ!

എഫ്സി ബാഴ്സലോണയുടെ ഫ്രഞ്ച് സൂപ്പർ താരമായ ഡെമ്പലെയുടെ ക്ലബ്ബുമായുള്ള കരാർ ഈ സീസണോടുകൂടിയാണ് അവസാനിക്കുക. താരം ബാഴ്സയിൽ തന്നെ തുടരുമോ അതല്ലെങ്കിൽ ക്ലബ്ബ് വിടുമോ എന്നുള്ളത് അവ്യക്തമാണ്. കഴിഞ്ഞ ജനുവരിയിൽ ക്ലബ്ബ് വിടാനുള്ള ശ്രമങ്ങൾ ഡെമ്പലെ നടത്തിയിരുന്നുവെങ്കിലും ഫലം കണ്ടിരുന്നില്ല. ക്ലബ്ബ് വിടാനുള്ള ആ തീരുമാനത്തിൽ ഇനി മാറ്റമുണ്ടാകുമോ എന്നുള്ളതാണ് അറിയേണ്ട കാര്യം.

എന്നാൽ താരം ക്ലബ്ബ് വിടുകയാണെങ്കിൽ ആ സ്ഥാനത്തേക്ക് മറ്റൊരു താരത്തെ ഇപ്പോൾ ബാഴ്സ കണ്ടുവെച്ചിട്ടുണ്ട്.ലീഡ്‌സ് യുണൈറ്റഡിന്റെ ബ്രസീലിയൻ സൂപ്പർ താരമായ റാഫീഞ്ഞയെയാണ് ബാഴ്സക്ക് ആവശ്യമുള്ളത്.താരത്തിന്റെ ഏജന്റായ ഡീക്കോയുമായി ഈ മാസത്തിന്റെ തുടക്കം തൊട്ടേ ബാഴ്സ അധികൃതർ ചർച്ചകൾ നടത്തുന്നുണ്ട്.

ഇപ്പോഴിതാ ഇതുമായി ബന്ധപ്പെട്ട് കൊണ്ട് പ്രമുഖ സ്പാനിഷ് മാധ്യമമായ സ്പോർട്ട് ഒരു റിപ്പോർട്ട്‌ പുറത്തു വിട്ടിട്ടുണ്ട്. അതായത് എഫ്സി ബാഴ്സലോണ റാഫീഞ്ഞയുടെ ക്ലബായ ലീഡ്സ് യുണൈറ്റഡിന് ഒരു ഓഫർ നൽകിയിട്ടുണ്ട്.35 മില്യൺ യുറോയാണ് ബാഴ്സ ഓഫർ ചെയ്തിരിക്കുന്നത്.എന്നാൽ ഇതിനോടുള്ള സമീപനം ഇതുവരെ ലീഡ്‌സ് രേഖപ്പെടുത്തിയിട്ടില്ല.

ചെൽസി ഉൾപ്പടെയുള്ള പ്രീമിയർ ലീഗ് ക്ലബ്ബുകളും ബ്രസീലിയൻ താരത്തിൽ താൽപര്യം പ്രകടിപ്പിട്ടുണ്ട്. നിലവിൽ പ്രീമിയർ ലീഗിൽ മോശം പ്രകടനമാണ് ലീഡ്സ് നടത്തുന്നത്. എന്നിരുന്നാലും ഒമ്പത് ഗോളുകളും മൂന്ന് അസിസ്റ്റുകളും താരം പ്രീമിയർ ലീഗിൽ സ്വന്തമാക്കിയിട്ടുണ്ട്.അതേസമയം ബ്രസീലിന്റെ ഇപ്പോൾ നടക്കുന്ന വേൾഡ് കപ്പ് യോഗ്യതാ മത്സരങ്ങൾക്കുള്ള ടീമിൽ താരം ഇടംപിടിച്ചിരുന്നുവെങ്കിലും കോവിഡ് ബാധിച്ചതോടെ ടീമിൽ നിന്നും പുറത്താവുകയായിരുന്നു.