പോർച്ചുഗീസ് സൂപ്പർ താരത്തിന്റെ ജേഴ്‌സി നമ്പറിൽ മാറ്റം വരുത്തി യുണൈറ്റഡ്!

മാഞ്ചസ്റ്റർ യുണൈറ്റഡിന്റെ സൂപ്പർ താരമായിരുന്ന യുവാൻ മാറ്റ ഈ സമ്മർ ട്രാൻസ്ഫർ ജാലകത്തിൽ ക്ലബ്ബ് വിട്ടിരുന്നു. ഫ്രീ ഏജന്റായി കൊണ്ടായിരുന്നു താരം ക്ലബ്ബിനോട് വിട പറഞ്ഞത്. അതുകൊണ്ടുതന്നെ യുണൈറ്റഡിലെ എട്ടാം നമ്പർ ജേഴ്സിക്ക് പുതിയ അവകാശികളെ ആവശ്യമായി വരികയായിരുന്നു.

ഇപ്പോഴിതാ എട്ടാം നമ്പർ ജേഴ്സി പോർച്ചുഗൽ സൂപ്പർതാരമായ ബ്രൂണോ ഫെർണാണ്ടസിന് മാഞ്ചസ്റ്റർ യുണൈറ്റഡ് നൽകിയിട്ടുണ്ട്.ഇക്കാര്യം മാഞ്ചസ്റ്റർ യുണൈറ്റഡ് തന്നെയാണ് സ്ഥിരീകരിച്ചിട്ടുള്ളത്. ഇതുവരെ 18 ആം നമ്പർ ജേഴ്സിയായിരുന്നു ബ്രൂണോ ഫെർണാണ്ടസ് ധരിച്ചിരുന്നത്. അടുത്ത സീസൺ മുതൽ താരം എട്ടാം നമ്പർ ജേഴ്സി യുണൈറ്റഡിലും അണിഞ്ഞു തുടങ്ങും.

പോർച്ചുഗല്ലിന്റെ ദേശീയ ടീമിലും ഉഡിനസ്,സ്പോർട്ടിങ് എന്നീ ക്ലബ്ബുകളിലുമൊക്കെ ബ്രൂണോ ഫെർണാണ്ടസ് എട്ടാം നമ്പർ ജേഴ്സിയായിരുന്നു അണിഞ്ഞിരുന്നത്.

1994 സെപ്റ്റംബർ എട്ടിനായിരുന്നു ബ്രൂണോ ഫെർണാണ്ടസ് ജനിച്ചത്.അതുകൊണ്ടാണ് താരം എട്ടാം നമ്പർ ജേഴ്സിക്ക് മുൻഗണന നൽകുന്നത്. മാഞ്ചസ്റ്റർ യുണൈറ്റഡിൽ മുമ്പ് വെയിൻ റൂണിയെ പോലെയുള്ള ഇതിഹാസങ്ങൾ അണിഞ്ഞിട്ടുള്ള ജേഴ്സിയാണ് എട്ടാം നമ്പർ ജേഴ്‌സി. അതുകൊണ്ടുതന്നെ ഇത് തനിക്ക് കൂടുതൽ ഉത്തരവാദിത്തങ്ങൾ നൽകുന്നു എന്നാണ് ബ്രൂണോ പറഞ്ഞിട്ടുള്ളത്.

അതേസമയം മാഞ്ചസ്റ്റർ യുണൈറ്റഡിന്റെ പുതിയ താരമായ ടൈറൽ മലാസിയയുടെ ജഴ്സി നമ്പറും ഇപ്പോൾ യുണൈറ്റഡ് പുറത്ത് വിട്ടിട്ടുണ്ട്.12-ആം നമ്പർ ജേഴ്സിയാണ് താരം യുണൈറ്റഡിൽ അണിയുക.