ഡി ബ്രൂയിനയാണ് മത്സരം എളുപ്പമാക്കിയത് : പ്രശംസിച്ച് പെപ്

ഇന്നലെ ഇംഗ്ലീഷ് പ്രീമിയർ ലീഗിൽ നടന്ന മത്സരത്തിൽ വിജയം നേടാൻ മാഞ്ചസ്റ്റർ സിറ്റിക്ക് സാധിച്ചിരുന്നു. രണ്ടിനെതിരെ നാലു ഗോളുകൾക്കായിരുന്നു സിറ്റി ക്രിസ്റ്റൽ പാലസിനെ തോൽപ്പിച്ചത്. സൂപ്പർ താരം കെവിൻ ഡി ബ്രൂയിനയാണ് മത്സരത്തിൽ തിളങ്ങിയിട്ടുള്ളത്. 2 ഗോളുകൾ നേടിയ താരം ഒരു അസിസ്റ്റും സ്വന്തമാക്കിയിരുന്നു.അദ്ദേഹത്തിന്റെ മികവിലാണ് സിറ്റി വിജയിച്ച് കയറിയത്.

താരത്തെ പ്രശംസിച്ചുകൊണ്ട് പരിശീലകൻ പെപ് ഗാർഡിയോള രംഗത്ത് വന്നിട്ടുണ്ട്. അതായത് ഈ മത്സരം എളുപ്പമാക്കിയതും സിറ്റിയെ വിജയിപ്പിച്ചതും ഡി ബ്രൂയിനയാണ് എന്നാണ് പെപ് പറഞ്ഞിട്ടുള്ളത്.ക്ലബ്ബിന്റെ ചരിത്രത്തിലെ ഏറ്റവും മികച്ച താരങ്ങളിൽ ഒരാളാണ് ഡി ബ്രൂയിനയെന്നും അദ്ദേഹം കൂട്ടിച്ചേർത്തു. പരിശീലകന്റെ വാക്കുകൾ ഇങ്ങനെയാണ്.

” ഈ മത്സരം വിജയിപ്പിച്ചത് ഡി ബ്രൂയിനയാണ്.നിങ്ങൾക്ക് പരിശീലകരെ കുറിച്ച് സംസാരിക്കാം, പക്ഷേ ഡി ബ്രൂയിനയെ പോലെയുള്ള താരങ്ങളാണ് ഈ മത്സരം എളുപ്പമാക്കുന്നത്.മാഞ്ചസ്റ്റർ സിറ്റി എന്ന ക്ലബ്ബിന്റെ ചരിത്രത്തിലെ ഏറ്റവും മികച്ച താരങ്ങളിൽ ഒരാളാണ് അദ്ദേഹം. കഴിഞ്ഞ 9 വർഷക്കാലമായി അദ്ദേഹം ഈ പ്രകടനം തുടരുന്നു. അദ്ദേഹത്തിന്റെ സ്ഥിരത അത്ഭുതപ്പെടുത്തുന്നതാണ്.ഈ മത്സരത്തിൽ അദ്ദേഹം നേടിയ ആദ്യത്തെ ഗോൾ വിശ്വസിക്കാൻ കഴിയാത്തതാണ്. മാനസികമായി അദ്ദേഹം ഇപ്പോൾ വളരെയധികം ഫ്രഷാണ്.ഇതെല്ലാം അദ്ദേഹം ആസ്വദിക്കുന്നു. അദ്ദേഹത്തിന്റെ ശരീരഭാഷയിൽ നിന്നും തന്നെ നമുക്ക് അത് വ്യക്തമാണ്. ഇനിയും ഇത് നിലനിർത്താൻ കഴിയുമെന്ന് ഞാൻ പ്രതീക്ഷിക്കുന്നു ” പെപ് പറഞ്ഞു.

ദീർഘകാലം പരിക്കിന്റെ പിടിയിലായിരുന്ന ഡി ബ്രൂയിനക്ക് നിരവധി മത്സരങ്ങൾ നഷ്ടമായിരുന്നു.പ്രീമിയർ ലീഗിൽ 11 മത്സരങ്ങൾ മാത്രമാണ് അദ്ദേഹം കളിച്ചിട്ടുള്ളത്.അതിൽ നിന്ന് മൂന്ന് ഗോളുകളും ആറ് അസിസ്റ്റുകളും അദ്ദേഹം നേടിയിട്ടുണ്ട്.ഈ സീസണിന് ശേഷം അദ്ദേഹം സിറ്റി വിടും എന്നുള്ള റൂമറുകളും സജീവമാണ്.