ഞാൻ എത്ര കാലമായി നിങ്ങളോടിത് പറയുന്നു,ആ രണ്ട് താരങ്ങൾ യുണൈറ്റഡിന് പറ്റിയവരേയല്ല : രൂക്ഷ വിമർശനവുമായി ഇതിഹാസതാരം!

ഇന്നലെ പ്രീമിയർ ലീഗിൽ നടന്ന ആദ്യ റൗണ്ട് മത്സരത്തിൽ വമ്പൻമാരായ മാഞ്ചസ്റ്റർ യുണൈറ്റഡിന് അട്ടിമറി തോൽവി ഏറ്റുവാങ്ങേണ്ടി വന്നിരുന്നു.ഒന്നിനെതിരെ 2 ഗോളുകൾക്കാണ് യുണൈറ്റഡ് ബ്രൈറ്റണോട് പരാജയം രുചിച്ചത്.ബ്രൈറ്റന്റെ രണ്ട് ഗോളുകളും ഗ്രോസ് നേടിയപ്പോൾ യുണൈറ്റഡ് നേടിയ ഒരു ഗോൾ മാക്ക് ആല്ലിസ്റ്ററുടെ സെൽഫ് ഗോളായിരുന്നു.

ഏതായാലും ഈ മത്സരശേഷം മാഞ്ചസ്റ്റർ യുണൈറ്റഡിന്റെ മധ്യനിര താരങ്ങളായ ഫ്രഡ്‌,മക്ടോമിനി എന്നിവർക്കെതിരെ രൂക്ഷ വിമർശനം ഉന്നയിച്ചുകൊണ്ട് ഇതിഹാസ താരമായ റോയ് കീൻ രംഗത്ത് വന്നിട്ടുണ്ട്.ഫ്രഡ്‌,മക്ടോമിനി എന്നിവർ മാഞ്ചസ്റ്റർ യുണൈറ്റഡിന് പറ്റിയ താരങ്ങളേയല്ല എന്നാണ് ഇദ്ദേഹം പറഞ്ഞിട്ടുള്ളത്.കീനിന്റെ വാക്കുകൾ മാഞ്ചസ്റ്റർ ഈവനിംഗ് ന്യൂസ് റിപ്പോർട്ട് ചെയ്യുന്നത് ഇങ്ങനെയാണ്.

“ഡിസിഷൻ മേക്കിങ്ങും ഇന്റലിജൻസും പ്രധാനപ്പെട്ട ഒരു കാര്യമാണ്.ഞാൻ ഒരുപാട് കാലമായി ഇക്കാര്യം പറയുന്നു. അതായത് ഫ്രഡും മക്ടോമിനിയും മതിയായ മികവുള്ള താരങ്ങൾ അല്ല. അവർ രണ്ടുപേരും മാഞ്ചസ്റ്റർ യുണൈറ്റഡിന് പറ്റിയ താരങ്ങളേയല്ല. അവർ ഒരിക്കലും ഇമ്പ്രൂവ് ആവുന്നില്ല. യഥാർത്ഥത്തിൽ രണ്ടാം പകുതിയിൽ ഒരു ഗാമ്പിൾ നടത്തുകയാണ് ചെയ്തിട്ടുള്ളത് ” ഇതാണ് കീൻ പറഞ്ഞിട്ടുള്ളത്.

ഏതായാലും തോൽവിയോട് കൂടിയാണ് ടെൻ ഹാഗ് പ്രീമിയർ ലീഗിലെ അരങ്ങേറ്റം കുറിച്ചിട്ടുള്ളത്. എന്നാൽ അദ്ദേഹത്തിന് ടീമിലെ പ്രശ്നങ്ങൾ പരിഹരിക്കാനാവുമെന്നാണ് മാഞ്ചസ്റ്റർ യുണൈറ്റഡ് ആരാധകർ ഇപ്പോഴും പ്രതീക്ഷിക്കുന്നത്.