ജിറോണക്ക് വേണ്ടി തകർപ്പൻ പ്രകടനം,ബ്രസീലിയൻ സൂപ്പർതാരത്തെ പൊക്കാൻ മാഞ്ചസ്റ്റർ സിറ്റി!

സിറ്റി ഗ്രൂപ്പിന്റെ ഉടമസ്ഥതയിലുള്ള ഫ്രഞ്ച് ക്ലബ്ബാണ് ട്രോയസ്. 2022 ലായിരുന്നു ബ്രസീലിയൻ സൂപ്പർ താരമായ സാവിയോയെ അവർ സ്വന്തമാക്കിയത്.പിന്നീട് അദ്ദേഹത്തെ ലോൺ അടിസ്ഥാനത്തിൽ വിടുകയായിരുന്നു. നിലവിൽ സ്പാനിഷ് ക്ലബ്ബായ ജിറോണക്ക് വേണ്ടിയാണ് ലോണിൽ സാവിയോ കളിക്കുന്നത്. സിറ്റി ഗ്രൂപ്പിന്റെ ഉടമസ്ഥതയിൽ തന്നെ ഉള്ള ക്ലബ്ബാണ് ജിറോണ.

ഈ സീസണിൽ എല്ലാവരെയും ഞെട്ടിച്ചുകൊണ്ട് മുന്നേറുകയാണ് ജിറോണ. നിലവിൽ ലാലിഗയിൽ രണ്ടാം സ്ഥാനത്ത് ജിറോണയാണ് ഉള്ളത്. ഒന്നാം സ്ഥാനക്കാരായ റയൽ മാഡ്രിഡിനും ജിറോണക്കും ഒരേ പോയിന്റാണ് ഉള്ളത്.ജിറോണയുടെ തകർപ്പൻ പ്രകടനത്തിൽ നിർണായക പങ്കുവഹിക്കാൻ സാവിയോക്ക് സാധിക്കുന്നുണ്ട് എന്നതാണ് യാഥാർത്ഥ്യം.18 ലീഗ് മത്സരങ്ങളിൽ നിന്ന് നാലു ഗോളുകളും 5 അസിസ്റ്റുകളും ഈ ബ്രസീലിയൻ താരം സ്വന്തമാക്കിയിട്ടുണ്ട്.

ഇപ്പോഴിതാ താരത്തെ സ്വന്തമാക്കാൻ മാഞ്ചസ്റ്റർ സിറ്റിക്ക് താല്പര്യമുണ്ട്.സാവിയോക്ക് കൊണ്ടുവരിക എന്നത് സിറ്റിയെ സംബന്ധിച്ചിടത്തോളം ബുദ്ധിമുട്ടുള്ള ഒരു കാര്യമായിരിക്കില്ല. എന്തെന്നാൽ സിറ്റി ഗ്രൂപ്പിന്റെ ഉടമസ്ഥതയിൽ തന്നെയാണ് ഈ മൂന്ന് ക്ലബ്ബുകളും ഉള്ളത്.ട്രോയസിൽ നിന്നാണ് സാവിയോയെ മാഞ്ചസ്റ്റർ സിറ്റിക്ക് സ്വന്തമാക്കേണ്ടത്.എന്നാൽ ജനുവരി ട്രാൻസ്ഫർ ജാലകത്തിൽ അദ്ദേഹം വരില്ല. ഈ സീസൺ അവസാനിച്ചാൽ മാത്രമാണ് സാവിയോ ജിറോണയോട് വിട പറയുകയുള്ളൂ.

മറ്റു പല ക്ലബ്ബുകളും താരത്തിൽ താൽപ്പര്യം പ്രകടിപ്പിച്ചിട്ടുണ്ട്.ആഴ്സണൽ ഉൾപ്പെടെയുള്ള പ്രീമിയർ ലീഗ് ക്ലബ്ബുകളും മറ്റു ചില ബുണ്ടസ് ലിഗ ക്ലബ്ബുകളും താരത്തിന് വേണ്ടി സിറ്റി ഗ്രൂപ്പിനെ സമീപിച്ചിട്ടുണ്ട്.30 മില്യൺ യൂറോയാണ് അദ്ദേഹത്തിന്റെ മൂല്യമായി കൊണ്ട് കണക്കാക്കപ്പെടുന്നത്. പക്ഷേ സിറ്റി ഗ്രൂപ്പ് താരത്തെ കൈവിടാൻ സാധ്യതയില്ല. മാഞ്ചസ്റ്റർ സിറ്റിയിലേക്ക് താരത്തെ കൈമാറാനാണ് ഇപ്പോൾ ഇവിടെ ഏറ്റവും കൂടുതൽ സാധ്യതകൾ അവശേഷിക്കുന്നത്.