ഗോൾഡൻ ബൂട്ടും പ്ലേ മേക്കർ അവാർഡും സ്വന്തമാക്കി സലാ!

ഇന്നലെ പ്രീമിയർ ലീഗിൽ നടന്ന അവസാന മത്സരത്തിൽ ഒന്നിനെതിരെ മൂന്ന് ഗോളുകൾക്കായിരുന്നു ലിവർപൂൾ വോൾവ്സിനെ പരാജയപ്പെടുത്തിയത്. ജയം നേടിയെങ്കിലും പ്രീമിയർ ലീഗ് കിരീടം ചൂടാൻ ലിവർപൂളിന് സാധിച്ചിരുന്നില്ല.ഒരൊറ്റ പോയിന്റിന്റെ വ്യത്യാസത്തിൽ മാഞ്ചസ്റ്റർ സിറ്റി പ്രീമിയർ ലീഗ് നേടുകയായിരുന്നു.

ഏതായാലും ഇന്നത്തെ മത്സരത്തിൽ ഒരു ഗോൾ കണ്ടെത്താൻ സൂപ്പർ താരം മുഹമ്മദ് സലാക്ക് സാധിച്ചിരുന്നു. ഇതോടുകൂടി പ്രീമിയർ ലീഗിലെ ഗോൾഡൻ ബൂട്ട് പുരസ്കാരം സലാ സ്വന്തമാക്കിയിട്ടുണ്ട്. 23 ഗോളുകൾ നേടിയ സലാ ടോട്ടൻഹാമിന്റെ സൂപ്പർ താരമായ സണ്ണിനൊപ്പമാണ് ഗോൾഡൻ ബൂട്ട് പങ്കു വെച്ചിട്ടുള്ളത്.

മാത്രമല്ല പ്രീമിയർ ലീഗിലെ പ്ലേ മേക്കർക്കുള്ള പുരസ്കാരവും സലാ തന്നെയാണ് സ്വന്തമാക്കിയിട്ടുള്ളത്. പ്രീമിയർ ലീഗിൽ ഏറ്റവും കൂടുതൽ അസിസ്റ്റുകൾ നേടുന്ന താരത്തിന് നൽകുന്ന പുരസ്കാരമാണിത്.13 അസിസ്റ്റുകളാണ് സലാ ലിവർപൂളിന് വേണ്ടി നേടിയിട്ടുള്ളത്. തന്റെ സഹതാരമായ ട്രന്റ് അലക്സാണ്ടർ അർണോൾഡിനെയാണ് സലാ ഇക്കാര്യത്തിൽ പിന്തള്ളിയത്. 12 അസിസ്റ്റുകളാണ് അർനോൾഡ് ഈ സീസണിൽ സ്വന്തമാക്കിയിട്ടുള്ളത്.

മിന്നുന്ന പ്രകടനമാണ് ഈ സീസണിൽ സലാ ലിവർപൂളിന് വേണ്ടി കാഴ്ചവെച്ചിട്ടുള്ളത്. ഇനി യുവേഫ ചാമ്പ്യൻസ് ലീഗ് ഫൈനലിൽ റയലിനെ നേരിടാനുള്ള ഒരുക്കത്തിലാണ് ലിവർപൂൾ ഉള്ളത്. ഇതിനോടകം തന്നെ രണ്ട് കിരീടങ്ങൾ സലായും സംഘവും കരസ്ഥമാക്കിയിട്ടുണ്ട്.