ക്രിസ്റ്റ്യാനോയുടെ സൈനിങ് യുണൈറ്റഡിന് ഗുണം ചെയ്തില്ല : തുറന്ന് പറഞ്ഞ് റൂണി

ഈ സീസണിലായിരുന്നു സൂപ്പർ താരം ക്രിസ്റ്റ്യാനോ റൊണാൾഡോ യുവന്റസ് വിട്ടുകൊണ്ട് മാഞ്ചസ്റ്റർ യുണൈറ്റഡിലേക്ക് തിരികെ എത്തിയത്. മോശമല്ലാത്ത രൂപത്തിലാണ് താരം ഈ സീസണിൽ കളിച്ചിട്ടുള്ളത്.ഈ സീസണിലെ യുണൈറ്റഡിന്റെ ടോപ് സ്കോററാണ് ക്രിസ്റ്റ്യാനോ.എന്നാൽ യുണൈറ്റഡ് മോശം പ്രകടനമാണ് ഈ സീസണിൽ പുറത്തെടുത്തിട്ടുള്ളത്.ഒരൊറ്റ കിരീടം പോലും നേടാൻ ഈ സീസണിൽ യുണൈറ്റഡിന് ഇനി സാധിക്കില്ല.

ഏതായാലും ക്രിസ്റ്റ്യാനോ റൊണാൾഡോയെ യുണൈറ്റഡ് തിരികെ എത്തിച്ചതിനെ കുറിച്ചുള്ള ചില കാര്യങ്ങൾ മുൻ യുണൈറ്റഡ് സൂപ്പർ താരമായിരുന്നു വെയിൻ റൂണി പങ്കുവെച്ചിട്ടുണ്ട്.അതായത് റൊണാൾഡോയെ വീണ്ടും സൈൻ ചെയ്തത് യുണൈറ്റഡിന് ഗുണകരമായില്ല എന്നാണ് റൂണി പറഞ്ഞിട്ടുള്ളത്. യുവതാരങ്ങളെയാണ് യുണൈറ്റഡിന് ഇനി ആവശ്യമെന്നും റൂണി കൂട്ടിച്ചേർത്തിട്ടുണ്ട്. കഴിഞ്ഞദിവസം സ്കൈ സ്പോർട്സിനോട് സംസാരിക്കുകയായിരുന്നു ഇദ്ദേഹം.റൂണിയുടെ വാക്കുകൾ ഇങ്ങനെയാണ്.

” നിലവിൽ ക്രിസ്റ്റ്യാനോയുടെ സൈനിങ് ഗുണം ചെയ്തില്ല എന്ന് പറയേണ്ടിവരും. അദ്ദേഹം ഒരുപാട് ഗോളുകൾ നേടിയിട്ടുണ്ട്, ചാമ്പ്യൻസ് ലീഗിൽ തുടക്കത്തിൽ പ്രധാനപ്പെട്ട ഗോളുകൾ നേടി,ടോട്ടൻഹാമിനെതിരെ അദ്ദേഹം ഹാട്രിക്ക് കരസ്ഥമാക്കി, പക്ഷേ നിങ്ങൾ ക്ലബ്ബിന്റെ ഭാവി നോക്കുകയാണെങ്കിൽ യുവതാരങ്ങളെയാണ് നിങ്ങൾക്കാവശ്യം.മികവുറ്റ യുവതാരങ്ങൾ രണ്ടോ മൂന്നോ വർഷം കൊണ്ട് യുണൈറ്റഡിനെ മികച്ചതാക്കി ഉയർത്തും.തന്റെ ഇരുപതാം വയസ്സിൽ കളിച്ചിരുന്ന ഒരു ക്രിസ്റ്റ്യാനോയല്ല നിലവിലുള്ളത്.അതാണ് ഫുട്ബോൾ.ഗോളിന്റെ കാര്യത്തിൽ അദ്ദേഹം എതിരാളികൾക്ക് ഒരു ഭീഷണിയാണ്. പക്ഷേ മത്സരത്തിൽ അതിനേക്കാൾ കൂടുതൽ ക്ലബ്ബിന് ആവശ്യമുണ്ട്.കൂടുതൽ യുവത്വമുള്ള,ഹങ്ക്രിയായിട്ടുള്ള താരങ്ങളെയാണ് യുണൈറ്റഡിന് ആവശ്യം ” ഇതാണ് റൂണി പറഞ്ഞിട്ടുള്ളത്.

റൂണിയും ക്രിസ്റ്റ്യാനോ റൊണാൾഡോയും മുമ്പ് യുണൈറ്റഡ് വേണ്ടി ഒരുമിച്ച് കളിച്ചവരാണ്.ഫെർഗൂസന് കീഴിൽ ഒരു പിടി കിരീടങ്ങൾ സ്വന്തമാക്കാൻ അന്ന് യുണൈറ്റഡിന് സാധിച്ചിരുന്നു.