ക്രിസ്റ്റ്യാനോയുടെ ഭാവി എന്താവും? റാഗ്നിക്ക് പറയുന്നു!

ഇന്നലെ പ്രീമിയർ ലീഗിൽ നടന്ന മത്സരത്തിൽ മാഞ്ചസ്റ്റർ യുണൈറ്റഡിന് സമനില വഴങ്ങേണ്ടി വന്നിരുന്നു. കരുത്തരായ ചെൽസിയായിരുന്നു യുണൈറ്റഡിന്റെ എതിരാളികൾ. ഇരുടീമുകളും ഓരോ ഗോളുകൾ വീതം നേടി കൊണ്ടാണ് സമനിലയിൽ പിരിഞ്ഞത്. സൂപ്പർ താരം ക്രിസ്റ്റ്യാനോ റൊണാൾഡോ ഒരിക്കൽ കൂടി ടീമിന്റെ രക്ഷകനാവുകയായിരുന്നു.

ഏതായാലും ക്രിസ്റ്റ്യാനോ റൊണാൾഡോ ഈ സീസണിന് ശേഷം ക്ലബ്ബ് വിടുമോ എന്നുള്ളത് വലിയൊരു ചോദ്യചിഹ്നമാണ്. ഈയൊരു വിഷയത്തിൽ യുണൈറ്റഡിന്റെ പരിശീലകനായ റാൾഫ് തന്റെ പ്രതികരണം രേഖപ്പെടുത്തിയിട്ടുണ്ട്. അതായത് ക്രിസ്റ്റ്യാനോയുടെ ഭാവി തീരുമാനിക്കേണ്ടത് അദ്ദേഹവും എറിക് ടെൻഹാഗുമാണ് എന്നാണ് റാൾഫ് പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ സ്കൈ സ്പോർട്സ് റിപ്പോർട്ട് ചെയ്യുന്നത് ഇങ്ങനെയാണ്.

” ക്രിസ്റ്റ്യാനോയുടെ പ്രായം 37 ആണ്. ഈ പ്രായത്തിലെ അദ്ദേഹത്തിന്റെ ഈ ആറ്റിറ്റ്യൂഡ്, അതൊരു സാധാരണമായ കാര്യമല്ല. അദ്ദേഹം ഇന്ന് കളിച്ചത് പോലെ തുടരുകയാണെങ്കിൽ അദ്ദേഹം ടീമിന് വലിയ ഒരു സഹായമായിരിക്കും. ഇനി എന്താണ് ഭാവിയിൽ ചെയ്യേണ്ടത് എന്നുള്ളത് ക്രിസ്റ്റ്യാനോയും ടെൻഹാഗുമാണ് തീരുമാനിക്കേണ്ടത്. പക്ഷേ അദ്ദേഹത്തിന്റെ പ്രകടനം, അത് ഏറെ മികച്ചതാണ് ” ഇതാണ് റാൾഫ് പറഞ്ഞിട്ടുള്ളത്.

ഈ പ്രീമിയർലീഗിൽ 17 ഗോളുകളാണ് ഇതുവരെ ക്രിസ്റ്റ്യാനോ നേടിയിട്ടുള്ളത്. ടോപ് സ്കോറർമാരുടെ പട്ടികയിൽ സലാക്ക് പിറകിൽ രണ്ടാമതാണ് താരം.